Parižde geçirilýän suwda ýüzmek boýunça Ýewropa çempionatynda 19 ýaşly nemes türgeni Ýohannes Libman 1500 metr aralyga erkin usulda ýüzmekde täze dünýä rekordyny goýdy. Final bäsleşiginde Libman bu aralygy 14 minut 26,79 sekuntda geçmegi başardy. Bu bolsa amerikan ýüzüjisi Bobbi Finkiň öňki rekordyndan tas dört sekunt tiz wagt — Fink Pariždäki Olimpiýa oýunlarynda 14 minut 30,67 sekunt netijäni görkezipdi. Ýewropa çempionatynyň kümüş medalyna wengriýaly Zalan Şarkan, bürünç medalyna bolsa Germaniýanyň ýene bir wekili Oliwer Klemet mynasyp boldy. Libman üçin bu Pariždäki ýaryşda eýýäm ikinji altyn medal boldy — ol mundan öň 800 metr aralyga erkin usulda ýüzmekde hem ýeňiş gazanyp, Ýewropanyň rekordyny goýupdy. Ýewropadaky rekord bilen birwagtda, Pan-Ýuwaş umman çempionatynda hem uly taryhy netije gazanyldy. Iki gezek Olimpiýa çempiony Keýt Duglas 50 metr aralyga erkin usulda ýüzmekde dünýä rekordyny döwdi. Deslapky ýüzüşde bu aralygy 23,49 sekuntda geçmegi başaran 24 ýaşly amerikaly türgen şu tomus Italiýadaky halkara bäsleşikde 23,55 sekunt netije görkezen watandaşy Gretçen Wolşuň rekordyny täzeledi. Duglas özüniň haýran galdyryjy sport karýerasynyň dowamynda ýedi gezek dünýä çempiony, Olimpiýa oýunlarynyň iki gezek kümüş we bürünç medalynyň eýesi, şeýle hem gysga suwda (25 metrlik basseýnde) dünýä çempionatlarynyň on gezek ýeňijisi boldy.