Türkmenistanyň Mejlisiniň wekilleri 14-nji awgustda Daşkentde geçirilen «Garaşsyz Özbegistan: 35 ýyllyk ösüş ýoly, özgertmeler, gazanylan netijeler we geljekki mümkinçilikler» atly halkara ylmy-amaly maslahata gatnaşdy. Maslahatyň maksatnamasy umumy mejlisi we dürli ugurlar boýunça mowzuklaýyn bölümleri öz içine aldy. Halkara maslahata hünärmenler, alymlar we parlament wekilleri gatnaşdy. Çäräniň mowzuklarynyň biri kanun çykaryjy edaralaryň ykdysady ösüşde, maýa goýum gurşawyny gowulandyrmakda we inklýuziw ykdysady ösüşi üpjün etmekde eýeleýän orny boldy. Şeýle hem gatnaşyjylar adam maýasy we durmuş syýasaty meselelerine seretdi. Ekologiýa durnuklylygyna, «ýaşyl» ykdysadyýeti ösdürmäge, suw howpsuzlygyna, klimatyň üýtgemegine uýgunlaşmaga, suw serişdelerini rejeli peýdalanmaga we Aralboýy sebitindäki özgerişlere aýratyn üns berildi. «Özgertmeleriň ileri tutulýan ugurlary: strategik netijeler, amaly maslahatlar we geljegi uly wezipeler» diýen jemleýji mejlisde gatnaşyjylar bölümçelerde seredilen meseleleri, şeýle hem sebit we halkara hyzmatdaşlygyny mundan beýläk-de berkitmek baradaky täze teklipleri maslahatlaşdy. Türkmenistanyň Mejlisiniň wekilleri öz çykyşlarynda raýatlaryň ýaşaýyş şertlerini ýokarlandyrmak, zähmet we dynç alyş şertlerini gowulandyrmak, bilim almak hem-de saglygy goraýyş üçin döwlet tarapyndan döredilýän mümkinçilikleri belledi. Şeýle hem halkara derejesinde geçirilýän maslahatlaryň halklaryň arasyndaky dostlugy we özara ynamy berkitmek, hyzmatdaşlygy giňeltmek hem-de milli kanunçylyk ulgamynda tejribe çalyşmak üçin meýdança hökmünde uly ähmiýete eýedigi nygtaldy.