Italiýanyň polisiýasy Parma şäheriniň golaýyndaky «Manýani-Rokka» gaznasynyň willasyndan mart aýynda ogurlanan üç sany sungat eserini yzyna gaýtardy. Renuaryň, Sezannyň we Matissiň çeken suratlarynyň umumy bahasy 8,9 million ýewrodan (10,4 million dollardan) geçýär diýip, Euronews habar berýär. ​Parma şäheriniň polisiýa başlygy Andrea Palýaronyň aýtmagyna görä, häzirki wagtda moldowaly 9 raýatyň işi derňelýär, olaryň bäşisi resmi ýagdaýda ogurlykda aýyplanyldy. Gymmatbaha suratlar güman edilýän şahslaryň biriniň öýünden tapyldy. Polisiýa ogurlyk pursatynyň wideoýazgysyny köpçülige ýetirdi. Onda ýüzi-gözüni bukan gara geýimli, başyna çyra dakynan iki erkek adamyň penjiräni döwüp, willa girişi görünýär. Olar derrew suratlaryň ýerleşýän otagyna tarap ýöräp, olary diwardan aýyrýarlar we daşarda garaşyp duran ülpetlerine geçirýärler. Tutuş jenaýat üç minuta-da ýetirilmän amala aşyrylýar. Ogrular Ogýust Renuaryň «Balyklar» (bahasy 3 million ýewro töweregi), Pol Sezannyň «Üljeli natýurmort» (6 million ýewro) we Anri Matissiň «Dalandaky çory» (20 müň ýewro) diýen eserlerini alyp gitdiler. «Manýani-Rokka» gaznasy Parmadan takmynan 20 kilometr uzaklykda ýerleşýär. Ýygyndyda Dýureriň, Rubensiň, Wan Deýkiň, Goýanyň we Moneniň hem eserleri bar. ​Bu ogurlyk Ýewropa muzeýlerine edilen nobatdaky talaňçylyk boldy. Geçen ýylyň oktýabr aýynda Pariždäki Luwrdan birnäçe minudyň içinde bahasy 88 million ýewro bolan gymmatbaha şaý-sepler ogurlanypdy.