Apple kompaniýasy 2026-njy maliýe ýylynyň üçünji çärýegini rekord 109,4 milliard dollar girdeji bilen tamamlady, bu geçen ýylyň degişli döwründäki görkezijiden 16% köpdür. Bu barada kompaniýanyň çärýeklik hasabatynda aýdylýar. Arassa peýda 29,8 milliard dollara deň boldy, bir paý üçin girdeji bolsa 2,02 dollara ýetdi. iPhone satuwyndan alnan girdeji 54,3 milliard dollar boldy, bu umumy görkezijiniň tas ýarysyny diýen ýaly düzýär. Hyzmatlar ugry kompaniýa 30,7 milliard dollar getirdi we ol hem rekordy täzeledi. Mac önümlerinden gelen girdeji 10,4 milliard dollara, iPad bolsa 6,2 milliard dollara deň boldy, dakylýan enjamlar, öý üçin harytlar we aksessuarlar ugry bolsa 7,9 milliard dollar getirdi. Bir ýyl öň Apple degişli çärýekde 94,04 milliard dollar girdeji gazanypdy, bir paýa düşýän girdeji bolsa 1,57 dollardy. Şunlukda, bir ýylyň içinde kompaniýanyň çärýeklik girdejisi 15 milliard dollardan hem gowrak artdy. Hasabat çap edilmezden öň Apple girdejiniň 14–17% aralygynda ösjekdigini çaklapdy, bu bolsa, takmynan, 107,2 milliarddan 110 milliard dollara çenli aralyga gabat gelýärdi. Hakyky netije kompaniýanyň öz çaklamalarynyň ýokary böleginde boldy. Apple kompaniýasynyň baş direktory Tim Kuk tamamlanan döwri kompaniýanyň taryhynda iň gowy iýun çärýegi diýip atlandyrdy. Ol kompaniýanyň doly täzelenen Siri AI kömekçisini, operasion ulgamlaryň täze görnüşlerini we çagalary goramak üçin täze funksiýalary görkezen «WWDC26» çäresini aýratyn ýatlap geçdi. Görnüşi ýaly, kompaniýa ýakyn ýyllarda esasy ünsi hut akylly kömekçä gönükdirse gerek.