Awgust aýynda Türkmenistanda birnäçe iri medeni we jemgyýetçilik çäreleri geçiriler. Geljekki wakalaryň meýilnamasy anna güni Hökümetiň mejlisinde hödürlendi diýip, TDH habar berýär. Öňde duran dabaralar, sergiler, maslahatlar we wagyz-nesihat çäreleri ýurduň Garaşsyzlygynyň 35 ýyllygyna, şeýle hem 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» diýen şygaryna bagyşlanýar. Hususan-da, tomusky dynç alyş döwründe çagalar üçin döredijilik we zehin bäsleşikleri, sport ýaryşlary, çeper okaýyşlar, şeýle hem milli oýunlar boýunça bäsleşikler guralar. Taryhy-medeni ýadygärlikler toplumlarynda «Taryhy ýadygärlikleriň ata-babalarymyzdan miras galan gymmatlyklary öwrenmekdäki orny» atly okuw maslahatlary geçiriler. Köpetdag döwlet tebigy goraghanasynda «Köpetdagyň tebigy gözellikleri» diýen maslahaty geçirmek göz öňünde tutulýar. Mundan başga-da, awgust aýynda aýdymçy ýaşlaryň «Ýaňlan, Diýarym!» telebäsleşiginiň Lebap we Mary welaýatlary boýunça jemleýji tapgyrlary, şeýle hem «Çalsana, bagşy!» döredijilik bäsleşiginiň jemleýji tapgyry geçiriler.