Türkmenistanda «Bitewi saglyk» çemeleşmesini durmuşa geçirmek boýunça milli pudagara sazlaýjy komitetiň bäşinji mejlisi Bütindünýä Saglygy Goraýyş Guramasynyň (BSGG) howandarlygynda Aşgabat şäherindäki BMG-niň binasynda «Merkezi Aziýada, Türkmenistanda «Bitewi saglyk» başlangyjynyň çäginde pandemiýalara garşy göreşmek, taýýarlyk görmek we öňüni almak» taslamasynyň çäklerinde geçirildi. BSGG-niň beýanatynda habar berlişi ýaly, mejlise gatnaşyjylaryň arasynda esasy milli ministrlikleriň we pudaklaýyn edaralaryň, şeýle hem BMG-niň Azyk we oba hojalyk guramasynyň (FAO), Merkezi Aziýa üçin Sebitleýin ekologiýa merkeziniň (CAREC) wekilleri gatnaşdylar. Mejlisiň esasy maksatlary 2026-njy ýylyň birinji ýarymynda Türkmenistanda taslamany durmuşa geçirmekde gazanylan üstünlikleri seljermek, şeýle hem milli kuwwaty mundan beýläk-de berkitmek we taslamanyň çäginde meýilleşdirilen çäreleriň netijeli ýerine ýetirilmegini üpjün etmek üçin ýylyň ikinji ýarymynda ileri tutulýan hereketleri ara alyp maslahatlaşmak we meýilleşdirmek boldy. «Bitewi saglyk» çemeleşmesiniň netijeleri we durmuşa geçirilişi ara alnyp maslahatlaşyldy Gazanylan netijelere, alnan sapaklara we pandemiýalaryň öňüni almak, olara taýýarlyk görmek we jogap bermek boýunça milli tagallalary goldamakda pudagara utgaşdyryşy we hyzmatdaşlygy mundan beýläk-de berkitmegiň mümkinçiliklerine, şol sanda ilatyň, esasan hem çagalaryň arasynda ýokançlyklaryň öňüni almak baradaky habardarlygyny ýokarlandyrmaga aýratyn üns berildi. Milli pudagara sazlaýjy komitet adamyň, haýwanlaryň we daşky gurşawyň saglygy üçin jogapkär bolan pudaklaryň arasynda hyzmatdaşlygy berkitmek üçin esasy platforma bolup hyzmat edýär. Utgaşdyrylan meýilleşdirmäge, maglumat alyşmaga we bilelikde çözgüt kabul edilmegine ýardam bermek bilen, komitet «Bitewi saglyk» çemeleşmesiniň netijeli amala aşyrylmagyny goldaýar.