Iki agram derejesinde UFC-niň öňki çempiony Konor Makgregor operasiýa geçirjekdigini, şondan soň bolsa gurama bilen häzirki şertnamasy boýunça iň soňky urşuna çykjakdygyny mälim etdi. Ýekşenbe güni Las-Wegasda geçirilen tutluşykda irlandiýaly türgen amerikaly Maks Holloweýe garşy söweş başlanandan bir minutdan gowrak wagtyň içinde tehniki nokaut bilen ýeňildi. Böküp aýagy bilen urgy urjak wagty Makgregor sag aýagynyň üstüne şowsuz düşdi we şondan soň tutluşygy dowam etdirip bilmedi. Soňra türgen but süňküniň kellesine şikes ýetendigini habar berdi. «Operasiýa. Dikeldiş. Türgenleşiklere dolanmak — we ýene-de söweşe. Şertnama boýunça iň soňky söweş garaşýar» – diýip, Makgregor özüniň Instagram sahypasynda ýazdy. Sişenbe güni irlandiýaly türgen 38 ýaşyny doldurdy. Ol 2021-nji ýylyň iýulyndan bäri, ýagny aýagynyň döwülmegi sebäpli Dastin Porýeden ýeňleni bäri oktagona çykmandy. Garyşyk başa-baş söweşlerdäki (MMA) karýerasy boýunça Makgregor 22 ýeňiş gazandy we ýedi gezek ýeňildi.