Şu hepdäniň dowamynda güýçli suw joşmalaryndan ejir çeken Hytaýyň günorta sebitleri täze bir synaga — «Bawi» super taýfunynyň golaýlaşmagyna taýýarlyk görýär. Sinoptikler şu ýyl ýurtda howa hadysalarynyň sanynyň has-da artjakdygyny duýdurýarlar — diýip, Reuters agentligi habar berýär. Hytaýyň Milli howa merkeziniň çaklamasyna görä, iýul aýynda Ýuwaş ummanynyň demirgazyk-günbatar böleginde we Günorta Hytaý deňzinde takmynan alty taýfun emele gelip biler. Bu görkeziji köpýyllyk ortaça 3,8 derejeden ep-esli ýokarydyr. Adatça 1,8 görkeziji bolanlygynda, olaryň üçüsiniň gury ýere çykmagy mümkindir. Şeýle hem harasatlaryň güýjüniň ortaça derejeden ýokary bolmagyna garaşylýar. Hünärmenler weýrançylykly howa hadysalarynyň köpelmegini howanyň üýtgemegi, şeýle hem Ýuwaş ummanynyň merkezi we gündogar böleklerinde ýerüsti suwlaryň wagtal-wagtal gyzmagy bilen häsiýetlendirilýän El-Ninýo hadysasynyň emele gelmegi bilen baglanyşdyrýarlar. Bu ýagdaý dünýä boýunça temperaturanyň ýokarlanmagyna we taýfunlaryň güýçlenmegine täsir edip bilýär. Diametri 1000 kilometrden gowrak bolan we ýeliň tizligi sagatda 290 kilometrden geçýän «Bawi» super taýfuny eýýäm Ýuwaş ummanynyň günbatar bölegindäki ABŞ-a degişli Rota adasynyň golaýynda gysga wagtlyk gury ýere çykdy. Şenbe güni onuň Hytaýa ýetmegine garaşylýar. Bu soňky bir hepdäniň dowamynda sebitde ýüze çykan ikinji tropiki harasat bolar. Geçen hepde bolsa «Maýsak» taýfuny Hytaýyň günortasyndaky Haýnan ada welaýatyna zarba urup, soňra tiz wagtda Guansi sebitine tarap süýşdi we iň uly zyýany şol ýerde ýetirdi. Onuň galyndy täsirleri ýurduň merkezi sebitlerinde azyndan iki tornado tüweleýiniň emele gelmegine hem sebäp boldy. Iň agyr ýagdaý Guansi sebitiniň Hençžou şäherinde ýüze çykdy. Bu şäher häzirki suw joşmalarynyň esasy merkezine öwrüldi. Duşenbe güni ýerli suw howdanlarynyň birindäki bent böwsülenden soň, şäheri güýçli suw akymlary basdy. Resmi maglumatlara görä, azyndan alty adam heläk bolupdyr, 375 müňden gowrak ýaşaýjy zyýan çekdi. Häkimiýetler pidalaryň sanynyň artmagynyň mümkindigini aýdýarlar. Käbir jaýlarda suwuň derejesi ikinji gata çenli ýetdi, ýaşaýjylaryň bir bölegi bolsa halas bolmak üçin üçeklerde gaçybatalga tapmaga mejbur boldy. Bilermenleriň bellemegine görä, Hytaýda şu ýylky taýfun möwsümi adaty ýyllara garanyňda ep-esli güýçli geçýär. El-Ninýo harasatlaryň ugruny Hytaýyň kenarlaryna has ýakynlaşdyrýar, howanyň üýtgemegi bolsa tupanlary has çygly we has weýran ediji edýär. Geçen hepde Bütindünýä meteorologiýa guramasy ýakyn aýlarda güýçli El-Ninýo hadysasynyň çalt emele gelmek ähtimallygy baradaky çaklamasyny ýokarlandyrdy.