Eýranyň we Täze Zelandiýanyň milli ýygyndylary futbol boýunça Dünýä çempionatynyň G toparçasyndaky ilkinji tapgyrdaky oýnunda 2:2 hasabynda deňme-deň oýnadylar. Duşuşyk Kaliforniýa ştatynyň Inglwud şäherinde geçirildi. Täze Zelandiýanyň futbolçysy Elaýja Jast eýranlylaryň derwezesine iki gezek pökgi geçirdi — 7-nji we 54-nji minutlarda. Muňa jogap hökmünde Ramin Rezaeýan 32-nji minutda hasabyň tapawudyny azaltdy, Muhammet Mohebi bolsa 64-nji minutda hasaby deňledi. Tapgyryň netijeleri boýunça iki ýygyndy hem bir utuk gazanyp, G toparçasynda birinji-ikinji orunlary paýlaşýar. Mundan ozal şol toparçada Belgiýanyň we Müsüriň milli ýygyndylary 1:1 hasabynda deňme-deň oýnadylar. Ikinji tapgyrda Eýran 21-nji iýunda Belgiýa bilen duşuşar, Täze Zelandiýa bolsa 22-nji iýunda Müsür bilen oýnar. ABŞ-da, Kanadada we Meksikada geçirilýän Dünýä çempionaty 19-njy iýulda tamamlanar. Taryhda ilkinji gezek bu ýaryşa 48 milli ýygyndy gatnaşýar. Olar 12 toparça bölünendir. Her toparçadan iň gowy iki ýygyndy, şeýle hem üçünji orny eýelän sekiz iň gowy topar 1/16 final tapgyryna çykmaga hukuk gazanar.