Şu günler Türkmenistanyň sebitlerinde halk teatrlarynyň arasynda guralýan «Şadyýan şahandazlar» atly bäsleşigiň welaýat tapgyrlary guramaçylykly dowam edýär. Balkanabat şäherindäki Beýik Saparmyrat Türkmenbaşy adyndaky Balkan welaýat döwlet drama teatrynda bäsleşigiň welaýat tapgyry geçirildi. Bu barada «Altyn asyr» elektron gazetinde habar berildi. Halk teatrlarynyň arasynda degişme sahna eserlerini ýerine ýetirmek boýunça ýaýbaňlandyrylan bu bäsleşikde türkmeniň gadymdan gelýän gylyk-häsiýetleri, şahandazlygy, göwnaçyklygy, wäşiligi, dilewarlygy, suhangöýligi aýdyň beýanyny tapdy. Şeýlelikde, Gyzylarbat etrabynyň medeniýet bölüminiň Janahyr şäherçe halk teatry baş baýraga mynasyp boldy. Türkmenbaşy şäher medeniýet bölüminiň, Gyzylarbat we Bereket etraplarynyň medeniýet bölümleriniň halk teatrlary-da degişlilikde 1-nji, 2-nji we 3-nji orunlary eýelediler.