Indoneziýanyň Daglyk Papua ülkesiniň Jaýawijaýa okrugynyň Wamene diýen obasynda taýpalaryň arasyndaky gapma-garşylykda azyndan 13 adam gurban boldy, 19 adam ýaralandy. Bu barada ýerli hukuk goraýjylara salgylanýan «MIR 24» gürrüň berýär. Ejir çekenleriň 3-si agyr ýagdaýda, ýene 16 adam ýeňil şikes aldy, onlarça ýaralylar Wamenanyň hassahanasynda bejergi alýar. Jaýawijaýanyň polisiýasynyň wekili Ipda Ependi al Huseýniniň ýerli «detikcom» portalyna gürrüň bermegine görä, pirime we kurima taýpalarynyň arasyndaky çaknyşykda garşydaşlar birek-birege ýaýdan peýkam atyşypdyrlar. Gapma-garşylygyň ýitileşmegi sebäpli iki taýpadan jemi 789 adam öýlerini terk etmäge mejbur bolupdyr. Polisiýa jenaýat işini derňeýär. Waka taýpalaryň arasyndaky köne jedeliň gaýtadan başlanmagy sebäp boldy diýlip, habarda bellenýär.