Pakistanyň Türkmenistandaky ilçisi Farýal Legari Türkmenistanyň Ministrler Kabinetiniň Başlygynyň orunbasary Batyr Annaýew bilen iki ýurduň arasynda awiaaragatnaşygy dikeltmek meselelerini maslahatlaşdy. Bu barada Pakistanyň Aşgabatdaky diplomatik wekilhanasynyň metbugat gullugy habar berdi. Duşuşygyň dowamynda taraplar ulag we aragatnaşyk ulgamynda ikitaraplaýyn hyzmatdaşlygy berkitmegiň zerurdygyny tassykladylar. Ilkinji nobatdaky wezipeleriň hatarynda — raýat awiasiýasyny ösdürmek we Türkmenistan bilen Pakistanyň arasynda uçar gatnawlaryny täzeden ýola goýmak üçin degişli meseleleri çözmek durýar. Şeýle-de, Pakistany hem-de Merkezi Aziýany Türkmenistanyň çäkleri arkaly birleşdirjek awtomobil we demir ýol gatnawlarynyň mümkinçiliklerini öwrenmek meýilleşdirilýär. Eýran we Türkmenistan arkaly demir ýol ulagyny peýdalanmak bilen ýurtlaryň arasyndaky söwdany giňeltmek meselesi aýratyn maslahatlaşyldy. Habarda bellenilişi ýaly, taraplar türkmen wekiliýetiniň Pakistana gurajak ýokary derejeli saparynyň öňüsyrasynda söwda ylalaşyklaryny tamamlamagyň üstünde işleri işjeňleşdirmek barada ylalaşdylar.