Gazagystan Respublikasynyň Merkezi referendum komissiýasy ýurduň täze Konstitusiýasyny kabul etmek boýunça geçirilen ses berişligiň deslapky netijelerini yglan etdi. Bu barada Tengrinews.kz neşiri habar berýär. 16-njy martyň irdenki maglumatlarynda täze resminamanyň kabul edilmegi üçin 7 954 667 raýatyň ses berendigi görkezilýär. Bu bolsa ses bermäge gatnaşanlaryň 87,15%-ine deňdir. Merkezi referendum komissiýasynyň başlygy Nurlan Abdirowyň habar bermegine görä, 898 099 adam täzelige garşy hökmünde ses berdi. Umumylykda ses bermäge 9 127 192 adam, ýagny ses bermäge hukugy bolan raýatlaryň 73,12%-i gatnaşdy. Kanunçylyk taýdan, eger saýlawçylaryň ýarysyndan gowragy gatnaşsa, referendum geçirilen diýlip hasap edilýär. Gazagystanyň prezidenti Kasym-Žomart Tokaýew täze Konstitusiýanyň kabul edilmegi bilen raýatlary gutlady we ählihalk referendumynyň iň ýokary derejede, açyk we adalatly geçendigini belledi. Üýtgeşmeler we goşmaçalar Konstitusiýanyň 77 maddasyna degişli bolup, bu Esasy kanunyň mazmunynyň takmynan 84%-ini tutýar. Täze redaksiýa döwlet häkimiýetiniň gurluşyny we ýurduň syýasy ulgamyny düýpli özgerdýär. Esasy üýtgeşmeleriň arasynda wise-prezident wezipesiniň girizilmegi, bir palataly parlamente — Gurultaýa geçilmegi, maslahat beriji edara — Gazagystanyň Halk Maslahatynyň döredilmegi bar. Şeýle hem, prezidentlige dalaşgärlere bolan talaplar hem üýtgedildi, şoňa görä, mundan beýläk olaryň döwlet gullugynda ýa-da saýlawly wezipelerde azyndan bäş ýyllyk iş tejribesiniň bolmalydygyna hem serediler. Şunlukda, prezidentiň diňe bir möhlet bilen saýlanmagy baradaky düzgün saklanyp galýar. Şeýle-de täze Konstitusiýada raýatlaryň hukuklary we azatlyklary, şahsy maglumatlaryň goragy, dilleriň we diniň statusy, nika, halkara şertnamalary, sebitlerdäki ýörite hukuk tertipleri we guramalaryň daşary ýurtdan maliýeleşdirilmeginiň aýdyňlygy baradaky düzgünler berkidilýär.