2026-njy ýylyň aprel aýyna meýilleşdirilen Artemis II missiýasynyň astronawtlary Aýyň töweregine uçuş wagtynda adaty Ýerdäki iýmitlere ýakyn bolan tagamlar bilen iýmitlener. Ekipaž üçin niýetlenen önümleriň sanawyny NASA hödürledi. 10 günlük uçuşa «Orion» kosmos gämisinde dört astronawt iberiler. Bu missiýa 1972-nji ýyldan bäri adamlaryň Ýeriň töweregindäki pes orbitanyň çäklerinden çykjak ilkinji ýagdaýy bolar. Iýmit sanawy kosmos iýmiti boýunça hünärmenler tarapyndan astronawtlar bilen bilelikde işlenip düzüldi. Menýu düzülende önümleriň kaloriýasyna, ýokumlylyk düzümine, saklanyş möhletine we ekipaž agzalarynyň şahsy isleglerine üns berildi. Iýmit sanawyna şular girdi: tortilýa, gowrulan sygyr döşi, peýnirli makaron, bişirilen brokkoli, ýaşyl noýba, gök önümli pirog (kiş), hozly kuskus, çernikaly granola, ertirlik üçin şöhlatlar. Şeýle hem bortda ajy souslar, ajyhurş, jem, bal, maňyz we badam ýaglary bolar. Astronawtlar kofe, ýaşyl çaý, mango we şetdaly smuzisi, şokoladly, wanilli we klubnikaly içgileri, limonad, alma çakyry, ananas içgisi we kakao ýaly içgileri saýlap biler. Şol bir wagtyň özünde, ekipažyň her bir agzasyna gije-gündiziň dowamynda ys beriji goşulan içgilerden ikiden kän almaga rugsat berler. Käbir tagamlar suw goşmagy talap edýär, munuň üçin gämide ýörite dispenser oturdyldy. Gäminiň uçýan we gonýan wagtynda iýmit taýýarlaýyş ulgamy işlemez, şonuň üçin bu tapgyrlarda öňünden taýýarlyksyz iýip bolýan önümler göz öňünde tutuldy. Orbita çykylandan soň, ekipaž naharlaryny gyzdyryp biler.