2026-njy ýylyň 4-nji martynda Türkmenistanyň Gazagystan Respublikasyndaky Ilçisi B.Rejepow Saken Seýfullin adyndaky Gazak Agrotehniki barlag uniwersitetiniň Dolandyryş geňeşiniň başlygy – rektory Kanat Tireuow bilen duşuşyp, bilim we ylym ulgamlaryndaky hyzmatdaşlygyň meselelerini maslahatlaşdy. Bu barada Türkmenistanyň DIM-i habar berýär. Söhbetdeşligiň dowamynda taraplar bilelikdäki ylmy-barlag taslamalaryny durmuşa geçirmek barada pikir alyşdy. Soňra Ilçi uniwersitetiň professor-mugallymlary we bu ýerde bilim alýan türkmen talyplary üçin Türkmenistanyň daşary syýasatynyň esasy ugurlaryna hem-de ýaşlar syýasatyna bagyşlanan leksiýa bilen çykyş etdi. Diplomat öz çykyşynda türkmen-gazak gatnaşyklarynyň häzirki wagtda strategik hyzmatdaşlygyň derejesine çykandygyny we 2026-njy ýylda Türkmenistanyň Garaşsyzlygynyň 35 ýyllygynyň giňden belleniljekdigini aýratyn nygtady. Şeýle hem çykyşyň dowamynda Türkmenistanyň Prezidenti Serdar Berdimuhamedowyň «Türkmenistanyň Bitaraplygy – parahatçylygyň we ynanyşmagyň aýdyň ýoly» atly täze kitaby tanyşdyryldy. Duşuşygyň ahyrynda Ilçi talyplaryň okuw we sport üstünlikleri bilen gyzyklanyp, ýaşlary gyzyklandyrýan sowallara jogap berdi.