Apple kompaniýasy 2026-njy ýylyň nusgasyndaky täzelenen iPad Air planşetini resmi taýdan tanyşdyrdy. Planşet 8 ýadroly prosessor we 9 ýadroly grafika bilen üpjün edilen M4 bir kristally ulgamyna esaslanýar. Kompaniýanyň beýanatyna görä, täze model geçen ýylky modelden 30% çalt we 2022-nji ýyldaky wersiýasyndan 2,3 esse güýçlüdir. Operatiw ýadyň göwrümi 12 GB-a çenli artdyryldy, maglumat geçiriş ukyby bolsa 120 GB/s ýetdi. Bu görkezijiler emeli aň funksiýalarynyň has netijeli işlemegi üçin niýetlenendir. Enjam Wi-Fi 7, Bluetooth 6 goldawyny we energiýa sarp edişiniň takmynan üçden bir bölegini azaldyp, 5G tizligini 50% artdyrýan C1X modemini aldy. iPad Air 2026 iki ölçegde — 11 we 13 dýuýmlyk ekranlar bilen elýeterli bolar. Olaryň ikisinde-de 60 Gs täzelenme ýygylygy bolan Liquid Retina displeýi ulanylýar. Planşet dört reňkde hödürlener. Deslapky sargytlar 4-nji martda açylar, dünýä derejesindäki satuwlar bolsa 2026-njy ýylyň 11-nji martynda başlar. Bahalary: 11 dýuýmlyk model (Wi-Fi): 600 dollar. 13 dýuýmlyk model (Wi-Fi): 800 dollar. 5G goldawy bolan wersiýalar: goşmaça 250 dollar gymmat. Apple aksessuarlaryň yzygiderliligini saklady: täze model Magic Keyboard we Pencil Pro bilen doly utgaşýar.