Barlagçylar rimlileriň Pireneý daglarynyň ispan böleginden altyn gazyp alandygynyň ilkinji göni subutnamasyny aldylar. Arheologlar gadymy magdan känlerini öwrendiler, ol ýerden çylşyrymly gidrotehniki desgalary we uly suw howdanynyň galyndylaryny tapdylar. Bu iş Žirona welaýatynyň Serdan sebitinde geçirildi. Mundan öň, şol ýerde emeli döredilen ýerüsti üýtgeşmeler, ýagny altynly gaýalary suw akymlary bilen ýuwmak üçin hendekler hasaba alnypdy. Munuň üçin rimliler suwy bir ýere toplamak üçin howdanlary we ony uly güýç bilen akdyrmak üçin bentleri gurupdyrlar. Desgalaryň ýaşyny kesgitlemek üçin alymlar optiki öýkünme lýuminessensiýany (OSL) ulandylar. Bu usul olara çökündilerdäki minerallara iň soňky gezek haçan ýagtylyk düşendigini kesgitlemäge mümkinçilik berýär. Çökündileriň iki gatlagynyň seljermesi olaryň altyn gazyp almagyň eýýäm bes edilen döwri bolan II–IV asyrlar aralygynda emele gelip başlandygyny görkezdi. Bu maglumatlar Rim döwrüne gabat geldi we Rim keramikasynyň tapyndylary bilen bilelikde magdanlaryň we gidrawliki toplumyň rimliler tarapyndan gurlup, ulanylandygynyň ilkinji jedelsiz subutnamasy boldy. Bu barlagyň netijeleri Land žurnalynda çap edildi.