Bahar paslynyň ilkinji gününde Aşgabatdaky Jemgyýetçilik guramalarynyň merkezinde Halkara zenanlar güni mynasybetli Türkmenistanyň Zenanlar birleşiginiň Merkezi geňeşi tarapyndan yglan edilen «Ýylyň zenany» bäsleşiginiň jemleýji tapgyry geçirildi. Bu döredijilik bäsleşigine ýurduň welaýatlaryndan, Aşgabat we Arkadag şäherlerinden saýlanan jemi 56 sany zähmetsöýer we zehinli zenan gatnaşdy. Bäsleşigiň esasy maksady gelin-gyzlaryň jemgyýetdäki ornuny dabaralandyrmakdan, olaryň döwletiň ösüşlerine goşýan goşandyny wagyz etmekden we ukyp-başarnyklaryny açyp görkezmekden ybarat boldy. Gatnaşyjylar 8 ugur boýunça bäsleşip, olaryň jemgyýetçilik işjeňligine, halal zähmetine we döredijilik üstünliklerine eminler topary tarapyndan ýokary baha berildi. Bäsleşigiň jemleri boýunça ýeňijiler: Güljemal Soltanowa (Balkan welaýatynyň Baş bilim müdirliginiň Çagalar we ýetginjekler döredijilik öýüniň müdiri) — «Ýylyň işewür zenany»; Güljan Amanmyradowa (Daşoguz welaýatynyň Şabat etrabynyň Biruny adyndaky geňeşliginiň Bagban obasynyň ýaşaýjysy) — «Ýylyň mährem zenany»; Şirin Tejenowa (Arkadag şäheriniň Saglygy goraýyş müdirliginiň «Tiz kömek» merkeziniň şepagat uýasy) — «Ýylyň çeper elli zenany»; Jennet Akmyradowa (Lebap welaýatynyň Döwletli etrabynyň Dostluk şäheriniň Çagalar we ýetginjekler döredijilik öýüniň tans-gurnak ýolbaşçysy) — «Ýylyň sungatda işjeň zenany»; Mähri Jojykowa (Mary welaýatynyň Mary etrabyndaky «Merw» ýyladyşhanasynyň müdiri) — «Ýylyň telekeçi zenany»; Oraztäç Nuryýewa (Aşgabat şäheriniň 165-nji çagalar bakja-bagynyň terbiýeçisi) — «Ýylyň halypa zenany»; Ogulsuraý Huseýinkulyýewa (Ahal welaýatynyň Polisiýa müdirliginiň Ak bugdaý etrabynyň polisiýa bölüminiň wekili) — «Ýylyň watançy zenany»; Tawus Hudaýberdiýewa (Mary welaýatynyň Garagum etrabynyň «Baýramaly» daýhan birleşiginiň kärendeçisi) — «Ýylyň öňdebaryjy oba zenany». Dabaranyň ahyrynda bäsleşigiň ýeňijilerine Türkmenistanyň Zenanlar birleşiginiň Merkezi geňeşiniň adyndan Hormat haty we gymmat bahaly sowgatlar dabaraly ýagdaýda gowşuryldy. Bu çäre türkmen zenanlaryna goýulýan belent sarpanyň nobatdaky subutnamasyna öwrüldi.