10-njy fewralda Eýran Yslam Respublikasynyň Türkmenistandaky ilçihanasy Eýranda Yslam ynkylabynyň Ýeňşiniň 47 ýyllygy hem-de Eýran Yslam Respublikasynyň Milli güni mynasybetli resmi kabul edişlik gurady. Çärä Eýranyň Türkmenistandaky Adatdan daşary we Doly ygtyýarly ilçisi Ali Mojtaba Ruzbehani, Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow, şeýle hem diplomatik korpusyň wekilleri we resmi adamlar gatnaşdylar. Ilçi Ali Mojtaba Ruzbehani öz çykyşynda 2025-nji ýylda Eýranyň gazanan üstünlikleri barada aýdyp, ýurduň ählumumy innowasiýa indeksinde öňdebaryjy on ýurduň hatarynda eýeleýän ornuny pugtalandyrandygyny nygtady. Şeýle-de ol derman serişdeleri pudagynda gazanylan üstünlikleri belläp, Eýranyň dünýäniň 13 ýurdunyň arasynda birinji orny, dünýä boýunça bolsa dördünji orny eýeleýändigini aýtdy. Ilçi Eýranyň aerokosmos senagatyndaky möhüm üstünlikleriniň hatarynda «Hoarom», «Zadar» we «Çam» atly ylmy-barlag hemralarynyň, şeýle-de «Gasem» we «Simorg» raketa-göterijileriniň üstünlikli uçurylandygyny belledi. Ali Mojtaba Ruzbehani Eýran bilen Türkmenistanyň arasynda iki taraplaýyn gatnaşyklary pugtalandyrmagyň möhümdigini nygtady. Onuň sözlerine görä, 2025-nji ýylda dürli derejelerde ikitaraplaýyn duşuşyklar geçirildi. Şol sanda fewral, maý we iýun aýlarynda Tähranda hem-de Aşgabatda daşary işler ministrleriniň duşuşyklary, aprel aýynda ýol-ulag ministrleriniň gepleşikleri, şeýle-de maý aýynda Aşgabatda iki ýurduň parlament wekilleriniň duşuşygy boldy. Ilçi geçen ýylyň dekabrynda Eýran Yslam Respublikasynyň prezidenti doktor Pezeşkianyň Parahatçylyk we ynanyşmak halkara maslahatyna gatnaşmak üçin Aşgabada amala aşyran saparyna, şeýle-de 2025-nji ýylyň awgustynda BMG-niň deňze çykalgasy bolmadyk ösüp barýan ýurtlar boýunça sammitine gatnaşmak üçin Eýranyň birinji wise-prezidenti jenap Arefiň Awaza amala aşyran saparyna aýratyn ünsi çekdi. Şeýle hem ilçi 2025-nji ýylyň maýynda Tähranda geçirilen Ykdysady hyzmatdaşlyk boýunça eýran–türkmen bilelikdäki hökümetara toparynyň 18-nji mejlisiniň ähmiýetini belledi. Bu mejlisiň maksady üstaşyr ýük geçirilişini 20 million tonna ýetirmek we söwda dolanyşygyny 5 milliard ABŞ-nyň dollaryna çykarmakdan ybaratdyr. Ali Mojtaba Ruzbehani meýilleşdirilen taslamalary tamamlamagyň hem-de senagat, ulag-üstaşyr, energetika, oba hojalygy, ulag we emeli aň ýaly ugurlarda täze mümkinçiliklere üns bermegiň möhümdigini aýtdy. Medeni hyzmatdaşlyk babatda ilçi türkmenistanlylaryň arasynda eýranly suratkeşleriň, miniatýura ussatlarynyň we saz toparlarynyň gatnaşmagynyň artandygyny, şeýle hem görnükli türkmen suratkeşleriniň Eýranda geçirilýän festiwallara gatnaşandygyny belledi. Ylym ulgamynda bolsa eýranly mekdep okuwçylary we talyplar Türkmenistanda geçirilen ylmy olimpiadalara we maslahatlara işjeň gatnaşdylar. Ilçi iki ýurduň arasyndaky ykdysady gatnaşyklaryň möçberiniň 2025-nji ýylda 25 göterim artandygyny, ministrler derejesinde we ondan ýokary derejedäki diplomatik saparlaryň sanynyň 13-den gowrak bolandygyny aýtdy. Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow öz çykyşynda çakylyk üçin minnetdarlyk bildirip, Eýran bilen Türkmenistanyň arasynda söwda-ykdysady gatnaşyklaryň ikitaraplaýyn hyzmatdaşlykda aýratyn orun eýeleýändigini nygtady. Raşid Meredow bilelikdäki hökümetara toparyň iki ýurduň arasyndaky gatnaşyklary pugtalandyrmakda we giňeltmekde möhüm mehanizm bolup hyzmat edýändigini aýtdy. Şeýle hem ol geçen ýyl Eýranyň Gürgen şäherinde Türkmenistanyň eksport kuwwatyna bagyşlanan ýöriteleşdirilen serginiň, noýabr aýynda bolsa Balkanabat şäherinde Eýran Yslam Respublikasynyň Gülistan welaýatynyň ýöriteleşdirilen sergisiniň geçirilendigini belledi. Sergä gatnaşmak üçin Türkmenistana Gülistan welaýatynyň häkiminiň ýolbaşçylygyndaky wekiliýet geldi. Ministr görkezilen döwürde takmynan 40-a golaý özara saparyň amala aşyrylandygyny we hyzmatdaşlygyň dürli ugurlary boýunça 100-den gowrak duşuşygyň geçirilendigini habar berdi. Çäre iki ýurduň arasyndaky hyzmatdaşlygy mundan beýläk-de ösdürmäge we çuňlaşdyrmaga bolan ymtylyşy görkezýän ýyly hem dostlukly ýagdaýda geçdi.