UEFA Çempionlar ligasynyň 2025/2026-njy ýyllar möwsüminiň utulan-çykdy (play-off) tapgyrynyň bije çekişligi geçirildi. Onuň netijesine görä «Real» ýene-de arada özüni «öýkeleden» topar bilen ýüzbe-ýüz bolar. Madridli klub öňňün ýaryşyň umumy tapgyrynyň jemleýji oýnunda Lissabonly «Benfika» garşy oýnapdy. Žoze Mourinýonyň şägirtleri şol duşuşykda 4:2 hasabynda ýeňiş gazandylar. «Benfika» üçin örän möhüm bolan dördünji topy madridlileriň derwezesine goşmaça wagtyň soňky sekuntlarynda derwezeban salypdy. Bu agyr ýeňliş sebäpli «Real» 1/8 finala göni ýollanma gazanmak mümkinçiligini elden gidirdi, lissabonlylar bolsa ýaryşy dowam etdirmek hukugyny gazandylar. Indi olar utulan-çykdy tapgyrynyň çäginde ýene iki duşuşyk geçirmeli bolar. Şunlukda, «Real» bilen «Benfika» yzly-yzyna üç gezek biri-biriniň garşysyna oýnar. Megerem, täze format sebäpli Ýewropanyň iň uly klub ýaryşynda şeýle ýagdaý ilkinji gezek ýüze çykýandyr. Utulan-çykdy tapgyrynyň ähli jübütleri: «Borussiýa» Dortmund (Germaniýa) — «Atalanta» (Italiýa) «Olimpiakos» (Gresiýa) — «Baýer» (Germaniýa) «Brýugge» (Belgiýa) — «Atletiko» Madrid (Ispaniýa) «Galatasaray» (Türkiýe) — «Ýuwentus» (Italiýa) «Monako» (Fransiýa) — «PSŽ» (Fransiýa) «Karabah» (Azerbaýjan) — «Nýukasl Ýunaýted» (Angliýa) «Budýo-Glimt» (Norwegiýa) — «Inter» (Italiýa) «Benfika» (Portugaliýa) — «Real» Madrid (Ispaniýa) Utulan-çykdy tapgyrynyň ilkinji oýunlary 17-nji we 18-nji fewralda, jogap duşuşyklary bolsa 24-nji we 25-nji fewralda geçiriler. Jedwelde ýokary orunlary eýelän toparlar jogap oýunlaryny öz meýdançalarynda kabul ederler. Bu duşuşyklaryň ýeňijileri soňra 1/8 finalda umumy tapgyryň iň gowy sekiz topary bilen ýüzleşerler. Ýaryşyň şol tapgyrynyň bije çekişligi 27-nji fewralda bolar.