Türkmenistan Hindistan bilen umumy medeni gymmatlyklary öwrenmek, gorap saklamak we ösdürmek boýunça işjeň işleri alyp barýar, şeýle hem bilim ulgamynda hyzmatdaşlygy ýola goýýar. Bu barada Türkmenistanyň daşary işler ministri Raşid Meredow Hindistan Respublikasynyň gününiň 76 ýyllygy mynasybetli geçirilen dabaraly kabul edişlikdäki çykyşynda aýtdy. «Türkmen-hindi gatnaşyklarynyň aýrylmaz bölegi medeniýet bilen baglanyşyklydyr. Biz türkmen we hindi halklarynyň umumy medeni gymmatlyklaryny öwrenmek, gorap saklamak we baýlaşdyrmak, şeýle hem olaryň adamzadyň umumy mirasyna goşan goşandyny giňeltmek ugrunda işjeň iş alyp barýarys» — diýip, daşary syýasat edarasynyň ýolbaşçysy belledi. Ol 2024-nji ýylda «Magtymguly Pyragy» medeni-seýilgäh toplumynda hindi ýazyjysy, şahyr, kompozitor we jemgyýetçilik işgäri Rabindranat Tagoryň ýadygärliginiň bina edilendigini nygtady. «Türkmenistanda biz Hindistanyň örän baý medeniýetine, onuň sazyna, kinematografiýasyna we edebiýatyna söýgi hem-de hormat bilen garaýarys, şeýle-de bilim ulgamynda işjeň hyzmatdaşlygy ösdürýäris. Hususan-da, biz Hindistanyň tehniki we ykdysady hyzmatdaşlyk maksatnamasynyň çäklerinde, şeýle hem Hindistanyň Medeni aragatnaşyklar geňeşiniň hödürleýän talyp haklary arkaly hyzmatdaşlygymyzy ösdürýäris» — diýip, ministr sözüniň üstüne goşdy. Daşary işler ministri Türkmenistanyň Prezidenti Serdar Berdimuhamedowyň we türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň adyndan milli baýram mynasybetli hindi dostlaryna mähirli gutlaglaryny ýetirdi. Şeýle hem ol türkmen-hindi gatnaşyklarynyň taryhynyň gadymy döwürlerden gözbaş alýandygyny, ýurtlaryň berk siwilizasion baglanyşyklary we esasy ruhy gymmatlyklaryň ýakynlygy bilen birleşýändigini nygtady.