Hytaý Halk Respublikasynyň Türkmenistandaky ilçihanasy Halkara ynsanperwer ylymlary we ösüş uniwersitetine hytaý diline, taryhyna we medeniýetine degişli okuw edebiýatlarynyň 190 nusgasyny gowşurdy. Bu barada «Neýtralnyý Türkmenistan» gazetinde habar berilýär. Bu toplumyň düzümine dürli derejeli taýýarlygy bolan talyplar üçin niýetlenen okuw kitaplary, sözlükler we tematiki neşirler girýär. Gowşurlan neşirleriň arasynda Si Szinpiniň hytaý we rus dillerindäki «Döwlet dolandyryşy barada» atly dört jiltlik kitaby, häzirki zaman Hytaýyň syýasy ulgamy baradaky seljerme işleri, şol sanda «Hytaý ulgamy: täze eýýamda Hytaýy dolandyrmak» we «Hytaýyň reformalar eýýamynyň şaýady: 40 adamyň hekaýasy» atly kitaplar bar. Toplumyň ep-esli bölegini maşklar we audio materiallar bilen üpjün edilen, başlangyç, orta we ýokary derejeler üçin niýetlenen «Häzirki zaman hytaý dili» okuw kitaplarynyň toplumlary düzýär. Kitaphananyň täze goşundylarynyň arasyna halkara HSK synagynyň ähli alty derejesi üçin rus diline terjime edilen ýöriteleşdirilen ýygy-ýygydan ulanylýan sözlükler, «Sinhowa ieroglifler sözlügi», frazeologik we tematiki sözlükler hem girdi. Toplumyň aýry-aýry bölümini Hytaýyň medeni mirasy baradaky neşirler, şol sanda nusgawy ýygyndylar, çeper eserler, hytaý poeziýasy, çaý medeniýeti, geografiýasy we däp-dessurlary baradaky kitaplardan ybarat.