Google 55 dile terjime etmek üçin açyk EA modelleriniň toplumyny – TranslateGemma-ny hödürledi. Ol ykjam gurluşlarda, noutbuklarda we bulut serwerlerinde internete birikmezden işleýär. Hatara modeliň üç wersiýasy girdi: 4 mlrd parametrli görnüş smartfonlar we ykjam gurluşlar, 12 mlrd parametrli model sarp ediji noutbuklary üçin niýetlenýär. 27 mlrd parametrli wersiýa bulut serwerleri üçin niýetlenýär we bir H100 wideokartynda ýa-da tenzor prosessorynda işläp bilýär. Terjimäniň hili ýalňyşlyklaryň sanyna baha berýän MetricX platformasynda barlandy (bal näçe az bolsa, şonça gowy). Ýalňyşlyklar Gemma 3 modelleri bilen deňeşdirilende azaldy. 12 mlrd parametrli TranslateGemma 3,6 bal, 27 mlrd parametrli Gemma 3 bolsa 4,04 bal gazandy. 12 mlrd parametrli Gemma 3 modeli bilen deňeşdirilende ýalňyşlyklaryň derejesi, takmynan, 26% azaldy. Kämilleşmeler 55 jübüt diliň ählisinde hasaba alyndy. Mysal üçin, iňlis dilinden islandiýa diline geçirilende ýalňyşlyk 30%, suahili diline geçirilende 25% azaldy. Modeller ugurdaş maglumatlary ulanmak we berkidiji okuwlar bilen iki tapgyrda okadyldy. Maglumatlaryň, takmynan, 30%-i umumy bolup, bu TranslateGemma-ny çat-bot ýaly hem ulanmaga mümkinçilik berýär. Modelleriň ählisi multimodal mümkinçilikleri saklady we suratlardan alnan teksti hem terjime edip bilýär. TranslateGemma modelleri Kaggle we Hugging Face platformalarynda elýeterlidir.