OpenAI kompaniýasy ChatGPT-de täze funksiýany – saglyk bilen baglanyşykly soraglar üçin ChatGPT Health ady bilen aýratyn bölümi hödürledi. Bu režimde ulanyjylar has şahsylaşdyrylan jogaplary almak üçin lukmançylyk ýazgylaryny we bedeniň ýagdaýyna gözegçilik ediji programmalary birikdirip bilýär. Kompaniýa ChatGPT Health üçin gizlinligi goramagyň goşmaça çäreleriniň hereket edýändigini belleýär. Bu bölümde alnyp barylýan söhbetler dil modellerini okatmak üçin ulanylmaýar. Häzir funksiýa synag tapgyrynda, goldanylýan programmalaryň sanawy bolsa sebite baglylykda üýtgäp biler. OpenAI ChatGPT Health-yň diagnoz goýmak ýa-da bejergi bellemek üçin niýetlenmändigine aýratyn ünsi çekýär. Hyzmatyň berýän jogaplary diňe maglumat beriji häsiýete eýe bolup, lukman maslahatlarynyň ornuny tutmaýar. Täze bölümiň işe girizilmegi saglygy goraýyş ulgamynda emeli aňyň ulanylmagyna gyzyklanmanyň artmagy bilen baglanyşyklydyr. Şol bir wagtyň özünde, ulanyjylaryň näçeräk şahsy maglumaty çat-botlara we sanly hyzmatlara ynanmaga taýýardygy baradaky pikir alyşmalar dowam edýär.