Hytaýda alty tonnalyk «Lanying R6000» konwertoplanynyň ilkinji uçuşy amala aşyryldy. «Sinhua» habar agentliginiň maglumatyna görä, synag uçuşy ýurduň günorta-günbataryndaky Siçuan welaýatynda geçirildi. Bu howa gämisi Hytaýyň «United Aircraft» kompaniýasy tarapyndan işlenip düzüldi, onuň hereketlendirijisini bolsa «AERO Engine Corporation» kärhanasy öndürdi. «Lanying R6000» modeliniň peýdaly ýük göterijiligi 2 tonna barabardyr. Onuň iň ýokary kreýser tizligi sagatda 550 km-e ýetýär, bu bolsa dikuçarlaryň görkezijilerinden takmynan iki esse ýokarydyr. Uçaryň uçuş aralygy 4000 km, iş beýikligi bolsa 7620 metre çenli ýetýär. Bu bolsa adaty dikuçarlaryň mümkinçiliklerinden ep-esli ýokarydyr. «Global Times» gazetiniň ýazmagyna görä, konwertoplan şäherara gatnawlarda, suw üstünden we daglyk ýerlerden amala aşyrylýan uçuşlarda ulanylar. Şeýle-de ol adatdan daşary ýagdaýlarda, ýangyn söndürmekde, lukmançylyk işgärlerini gatnatmakda, polisiýa gözegçiligini ýöretmekde we tebigy betbagtçylyklaryň netijelerini aradan aýyrmakda ulanmak üçin niýetlenendir. «Lanying R6000» modeliniň gurluşy dik uçuşdan we gonuşdan ýokary tizlikli gorizontal uçuşa bökdençsiz geçmäge mümkinçilik berýär. Şeýle hem enjamyň ganatlarynyň we perleriniň eplenip bilinmegi, duralgada onuň tutýan meýdanyny tygşytlamaga kömek edýär.