Moskwada Russiýanyň emeli aňly (EA) ilkinji adam şekilli (gumanoid) robotynyň tanyşdyrylyşy boldy. Bu barada TASS agentligi Milli Tehnologiýa Koalisiýasyna salgylanyp habar berdi. "Moskwa" agentliginiň maglumatyna görä, "Aýdol" (Aidol) atly robot deňagramlylygyny saklap bilmän, eýýäm tanyşdyrylyşyň başynda ýykyldy. Neşir edilen wideoýazgyda robotyň "Rokki" filminiň aýdymynyň astynda iki adamyň ýanynda sahnada çykýandygy, birnäçe ädim ädýändigi, elini galgadyp salam bermäge synanyşýandygy we soňra bolsa tekiz ýerde ýykylýandygy görünýär. Şondan soň tanyşdyryş kesildi we robot sahnadan aýryldy. "Aýdol" kompaniýasynyň esaslandyryjysy Wladimir Wituhin bu meseläniň stereo kameralar sebäpli ýüze çykandygyny, sebäbi olaryň ýagtylyga duýgur bolandygyny, zalyň bolsa garaňkydygyny düşündirdi. Ikinji gezek sahnada çykanda, "Aýdol" eýýäm operatorlaryň kömegi bilen aýakda durmagy başardy. Wituhin robotuň ähli zatlarynyň oňatdygyny goşdy we şeýle kynçylyklaryň ulgamy kämilleşdirmäge kömek edýändigini nygtady. Ol: "Bu, hakyky wagtda şowly ýalňyşlygyň bilime, şowsuz ýalňyşlygyň bolsa tejribä öwrülip öwredýän ýagdaýydyr. Bu ýalňyşlyk tejribä öwrüler diýip umyt edýärin" diýip belledi. Işläp düzüjiler "Aýdolyň" ýöremäge, zatlary dolandyrmaga we adamlar bilen aragatnaşyk saklamaga ukyplydygyny habar berdiler. Ol alty sagada çenli özbaşdak işläp bilýär. Robotyň bölekleriniň 77%-niň Russiýada öndürilendigi bellenilýär; geljekde bu görkezijini 93%-e çenli ýokarlandyrmak meýilleşdirilýär. Robotyň "ýüzi" azyndan 12 esasy duýgyny, şeýle hem "ýüzlerçe" mikro-aňlatmalary görkezip biler. Döredijileriň pikirine görä, şeýle maşynlar zawodlarda, logistika pudagynda, howa menzillerinde, banklarda we hyzmat ediş ulgamynda ulanylyp bilner.