2025-nji ýylda ABŞ-nyň ykdysadyýeti, esasan, emeli aň infrastrukturasyna maýa goýumlaryň ýokarlanmagy netijesinde durgunlykdan halas boldy. Derňew hut bu pudagyň Birleşen Ştatlaryň jemi içerki önümi üçin esasy hereketlendirijä öwrülendigini görkezýär. Garward uniwersitetiniň ykdysatçysy Jeýson Furman tehnologiýa pudagy üçin çykdajylary hasaba almasaň, birinji ýarymýyllykda ABŞ-nyň jemi içerki önüminiň ösüşiniň bary-ýogy 0,1% bolup biljekdigini belledi. “Maglumatlary gaýtadan işlemek üçin enjamlara we programma üpjünçiligine maýa goýumlar JIÖ-niň 4%-ini emele getirýär. Ýöne olar şu ýylyň birinji ýarymynda JIÖ-niň ösüşiniň 92%-ini üpjün etdi” – diýip, Furman belledi. Hasaplaýyş güýjüne bolan islegiň ýokarlanmagy iri amerikan kompaniýalarynyň maýa çykdajylarynyň ep-esli ýokarlanmagyna getirdi. Microsoft, Google, Amazon, Meta we Nvidia maglumat merkezlerini gurmak we döwrebaplaşdyrmak, ýörite tizleşdirijileri satyn almak we energiýa taýdan netijeli tehnologiýalary ösdürmek üçin onlarça milliard dollar gönükdirdi. Furmanyň hasaplamasy boýunça, göterim goýumlary ýokary we elektrik energiýasy gymmat bolmadyk bolsa, bu maýa goýumlaryň täsiri pes bolardy. Ol EA pudagynda ösüş bolmazdan bu faktorlaryň ykdysadyýetiň häzirki ösüşiniň diňe ýarysyny üpjün edip biljekdigini öňe sürýär. Morgan Stanley Wealth-yň maýa goýumlar boýunça direktory Liza Şallet soňky ýyllarda tehnologiýa kompaniýalarynyň EA merkezlerine maýa goýumlary tas dört esse, ýylda 400 mlrd dollara çenli artdyrandygyny aýtdy. Ol bu ösüşiň pudakdaky ähli maýa çykdajylarynyň tas üçden birini emele getirýändigini we JIÖ-niň hakyky ösüşine bir göterim punkt goşýandygyny belledi. Şol bir wagtyň özünde, senagat, gurluşyk, söwda we hyzmatlar ýaly beýleki pudaklarda işjeňlik gowşak bolup galýar. Bu hem tehnologiýa maýa goýumlar bolmazdan ABŞ-nyň ykdysadyýetiniň durgunlyga sezewar bolup biljekdigi barada alada döredýär.