Xiaomi arzan bahaly täze Redmi 15C we Poco C85 smartfonlaryny çykarmaga taýýarlanýar. Olaryň suratlary sertifikatlaşdyrylýan wagty internetde peýda boldy. Şeýle-de resmi ýaly görünýän şekil suratlary hem ýaýradyldy. Iki enjam hem Tailandyň NBTC bazasynda ýüze çykaryldy: Redmi 15C – 25078RA3EA belgili, Poco C85 bolsa – 25078PC3EG belgili. Belgileriniň birmeňzeşräk bolmagy olaryň bilelikde satuwa çykaryljakdygyny aňladyp biler. Redmi 15C-niň suratlarynda onuň arka panelinde el ýazuwyna meňzeş ýazgynyň bardygyny görmek bolýar. Smartfon dört dürli reňkde hödürlener: Moonlight Blue (mawy), Twilight Orange (narynç), Midnight Black (gara) we ýaşyl. Ilkinji maglumatlara görä, smartfon 4 GB operatiw ýat we 128 GB hemişelik ýat bilen üpjün ediler. FCC-niň sertifikatlaşdyrma maglumatlaryna görä, enjam 6,9 dýuýmlyk HD+ LCD displeý, 6000 mA·sag sygymly batareýa we 33 Wt kuwwatly tiz zarýad beriş mümkinçiliklerine eýe bolar. Iki modeliň hem diňe 4G torlaryny goldamagyna we Xiaomi-niň HyperOS interfeýsi (Android 15 esasly) bilen çykmagyna garaşylýar. Model kodlarynyň «2507» bilen başlamagy smartfonlaryň iýul aýynda çykarylmak ähtimallygyny görkezýär, ýöne Xiaomi hemişe bu prinsipe görä hereket etmeýär.