Türkmenistanyň ussat gallaçy kärendeçileri Watan harmanyna ak bugdaýyň 1 million tonnadan gowragyny tabşyrdylar. Meýilnama laýyklykda, Ahal welaýaty boýunça 195 müň gektar meýdandan bugdaýyň 400 müň tonnasyny taýýarlamak meýilleşdirilýär. Balkan welaýatynyň gallaçylary 50 müň gektar ýerde däne ýetişdirip, şondan 80 müň tonna bugdaý hasylyny almaga borçlanýar. Daşoguz welaýatynyň ussat gallaçylary 145 müň gektar meýdanda ýetişen bugdaýyň hasylyny soňky dänesine çenli ýitgisiz ýygnap alyp, şu ýylda 265 müň tonna bugdaý öndürmek ugrunda öndürijilikli zähmet çekýärler. 130 müň gektarda ak bugdaýyň bol hasylyny kemala getiren lebaply gallaçylar şonça ýerden gallanyň 310 müň tonnasyny taýýarlamak ugrunda ähli mümkinçiliklerden netijeli peýdalanýarlar. Mary welaýatynyň gallaçylary 345 müň tonna galla taýýarlamaga borçlandylar. Bu zähmet ýeňşi Watanymyzyň gallaçylarynyň 1 million 400 tonna ak bugdaý hasylyny ýygnap, öňde duran arzyly sepgide üstünlikli ýetjekdiklerine ynamy artdyrýar.