«De Tomaso Automobili» italýan brendi 11 ýyldan soň «P72» superkarynyň köpçülikleýin önümçilik üçin niýetlenen wersiýasyny hödürledi. Ilkinji ulaglar müşderilere 2025-nji ýylyň ahyrynda gowşurylar. Bu modelden bary-ýogy 72 sanysy öndüriler. «P72» konsept-kary ilkinji gezek 2019-njy ýylda Gudwuddaky Tizlik festiwalynda görkezilipdi. Ulagyň dizaýny üçin 1965-nji ýylyň klassyky «De Tomaso P70» modelinden ylham alnypdyr. Kompaniýanyň inženerleriniň aýtmagyna görä, superkar el bilen ýygnalan 5 litrlik V8 hereketlendiriji bilen enjamlaşdyrylandyr. Onuň kuwwaty 700 at güýjüne çenli ýetýär we 820 Nm tork berýär. Bu hereketlendiriji bilen 6 basgançakly geçiriş karobkasy utgaşýar. Bu bolsa tiz jogap bermegi we dinamiki tizlenmäni üpjün edýär. «P72-niň» kuzowy uglerod süýüminden taýýarlanypdyr we pes agyrlyk merkezli ýeňil şassiniň üstünde ýerleşdirilipdir. Asma ulgamy itekleýji ştangalar we el bilen sazlanýan 3 derejeli amortizatorlar bilen enjamlaşdyrylan. Modeliň interýeri minimalist äheňde ýerine ýetirilen. Onda sanly displeýler ýa-da dynç alyş ulgamlary ýok. Diňe analog gurallar we ýörite sargyt esasynda taýýarlanan alýumin düwmeler bar. Neşir edilen suratlarda salonyň bezegi görkezilýär, emma müşderiler öz isleglerine görä içki bezegini üýtgedip saýlap bilerler. Awtoulagyň bahasy entek mälim edilmedi. Ilkibaşda internetde bu model üçin 1,6 million ýewro baha kesgitlenipdi, ýöne ahyrky bahasy konfigurasiýasyna we aýratyn sargytlara bagly bolar. Önümçiligi Germaniýada alnyp barylýar.