3-nji aprelde Samarkanda iş saparynyň çäklerinde Prezident Serdar Berdimuhamedow Özbegistanyň Prezidenti Şawkat Mirziýoýew bilen duşuşdy. Bu barada “Watan” habarlar gepleşiginde habar berildi. Duşuşygyň dowamynda söhbetdeşler türkmen-özbek gatnaşyklarynyň giň ugurlarda, şol sanda oba hojalygynda, elektrik energetikasynda, nebitgaz toplumynda, himiýa senagatynda we beýleki pudaklarda okgunly ösdürilýändigini kanagatlanma bilen bellediler. Ulag we energetika geçelgelerini döretmäge, sebitara gatnaşyklary pugtalandyrmaga, şeýle hem Merkezi Aziýada durnukly ösüşi üpjün etmek boýunça möhüm meseleleri çözmek babatda alnyp barylýan bilelikdäki işlere aýratyn üns berilýär. Şunuň bilen baglylykda, şu Sammitiň Merkezi Aziýanyň we Ýewropa Bileleşiginiň arasynda has netijeli we özara bähbitli hyzmatdaşlygyň ýolunda möhüm ädim boljakdygyna ynam bildirildi. Şeýle hem soňky döwürde iki ýurduň işewür toparlarynyň arasyndaky gatnaşyklaryň has işjeňleşendigi bellenildi. Şunda entek ulanylmadyk uly mümkinçilikleriň bardygy nygtaldy. Şolardan netijeli peýdalanylmagy, gürrüňsiz, özara bähbitlere hyzmat eder. Şunuň bilen baglylykda, Söwda-ykdysady, ylmy-tehniki we medeni hyzmatdaşlyk boýunça bilelikdäki türkmen-özbek toparynyň işini mundan beýläk-de işjeňleşdirmegiň maksadalaýyk boljakdygy bellenildi. Ynsanperwer ulgamda, ylym, bilim we medeniýet ugurlarynda özara gatnaşyklar netijeli häsiýete eýedir. Bellenilişi ýaly, bu babatda Türkmenistan we Özbegistan baý tejribe topladylar. Bu tejribe häzirki döwrüň talaplaryna hem-de iki döwletiň erk-isleglerine laýyklykda ösdürilýär we baýlaşdyrylýar.

Täzelikler, Ata Watan tarapyndan 19 hours ago
Teswir ýazmak üçin Içeri gir