2-nji aprelde Prezident Serdar Berdimuhamedow Döwlet howpsuzlyk geňeşiniň nobatdaky mejlisini geçirdi. Onda ýurdumyzyň harby we hukuk goraýjy edaralarynyň şu ýylyň üç aýynda ýerine ýetiren işleriniň netijelerine garaldy. Bu barada “Watan” habarlar gepleşiginde habar berildi. Mejlisiň barşynda Döwlet howpsuzlyk geňeşiniň sekretary, goranmak ministri B.Gündogdyýew Türkmenistanyň Ýaragly Güýçlerini ösdürmegiň maksatnamasynda göz öňünde tutulan wezipeleri üstünlikli ýerine ýetirmek maksady bilen, ýylyň başyndan bäri alnyp barlan işler barada hasabat berdi. Baş prokuror B.Muhamedow kadalaşdyryjy–hukuk namalarynyň ýerine ýetirilişine gözegçiligi amala aşyrmak boýunça berlen tabşyryklaryň berjaý edilişi barada hasabat berdi. Içeri işler ministri M.Hydyrow ýurdumyzda jemgyýetçilik tertibini üpjün etmek, ýol-ulag hadysalarynyň öňüni almak, ýangyn howpsuzlygy gullugynyň işini kämilleşdirmek boýunça alyp baran işleriniň netijeleri barada hasabat berdi. Serdar Berdimuhamedow mejlisiň dowamynda polisiýanyň podpolkownigi W.Ataýewi içeri işler ministriniň orunbasary wezipesinden boşatmak hem-de bu wezipä polisiýanyň podpolkownigi Ö.Kakalyýewi bellemek hakynda Kararlara gol çekdi. Ýokary kazyýetiň başlygy B.Hojamgulyýew kazyýet işini döwrüň talaplaryna laýyklykda guramak boýunça görlen çäreler barada hasabat berdi. Milli howpsuzlyk ministri N.Atagaraýew döwletimiziň milli bähbitlerini goramak, ýurdumyzda durnuklylygy we abadançylygy üpjün etmek boýunça geçirilen çäreler barada hasabat berdi. Döwlet serhet gullugynyň başlygy Ý.Nuryýew Watanymyzyň mukaddes serhetlerini goramak boýunça görlen çäreler barada hasabat berdi. Adalat ministri M.Taganow ýurdumyzyň kanunçylyk binýadyny kämilleşdirmek boýunça teklipleri taýýarlamak babatda görlen çäreler barada hasabat berdi. Döwlet gümrük gullugynyň başlygy M.Hudaýkulyýew gullugy ösdürmegiň maksatnamasynyň durmuşa geçirilişiniň barşy barada aýtdy. Döwlet migrasiýa gullugynyň başlygy A.Sazakow edaranyň maddy-enjamlaýyn binýadyny pugtalandyrmak, gullugy ösdürmegiň maksatnamasyny üstünlikli ýerine ýetirmek boýunça görlen çäreler barada hasabat berdi.