2025-nji ýylyň 17-18-nji aprelinde Magtymguly adyndaky Türkmen döwlet uniwersitetinde «Medeni mirasy öwrenmekde we goramakda halkara parahatçylygyň hem-de ynanyşmagyň orny» atly sanly ulgam arkaly halkara ylmy-amaly maslahat geçiriler. Maslahaty uniwersitetiň ÝUNESKO kafedrasy Türkmenistanyň hemişelik Bitaraplygynyň şanly 30 ýyllygy hem-de 18-nji aprel – Bütindünýä mirasynyň halkara güni mynasybetli geçirýär. Foruma Türkmenistanyň we daşary ýurtlaryň ýokary okuw mekdepleriniň we ylmy-barlag merkezleriniň professor-mugallymlaryň, alymlaryň, ylmy işgärleriň, aspirantlaryň we doktorantlaryň, ÝUNESKO kafedralarynyň we klublarynyň, ÝUNESKO-nyň assosirlenen mekdepleriniň wekilleriniň gatnaşmagyna garaşylýar. Maslahat umumy mejlisde we 4 bölümde öz işini alyp barar: I bölüm: Hemişelik Bitarap Türkmenistanyň parahatçylyk we ynanyşmak syýasaty – medeni-ynsanperwer hyzmatdaşlygyň binýady. II bölüm: Türkmenistan – ÝUNESKO: milli we bütindünýä medeni mirasy goramak boýunça tagallalar. III bölüm: Medeni mirasy öwrenmegiň ylmy ugurlary. IV bölüm: Türkmen halkynyň we dünýä halklarynyň maddy-ruhy medeniýeti: täze barlaglar we seljermeler. Maslahata gatnaşmaga isleg bildirýänler çykyşlarynyň gysgaça beýanlaryny (tezislerini), annotasiýalary we hasaba alyş kagyzyny 2025-nji ýylyň 7-nji apreline çenli tsu.unescochair@gmail.com elektron salgysyna ibermeli. Maslahatyň çykyşlarynyň gysgaça beýanlarynyň elektron ýygyndysy taýýarlanylar. Ulgama baglanmak üçin salgy goşmaça iberiler. Goşmaça maglumatlar Magtymguly adyndaky Türkmen döwlet uniwersitetiniň https://www.tdu.edu.tm resmi web saýtynyň “ÝUNESKO – 2025” bölüminde ýerleşdirilýär. Habarlaşmak üçin: Telefon: (+99312) 94-58-49; (+99312) 39-86-62; (+99312) 94-67-98; (+99365) 64-93-62 Elektron salgysy: tsu.unescochair@gmail.com

Täzelikler, Ata Watan tarapyndan 1 day ago
Teswir ýazmak üçin Içeri gir