Alymlar aýallaryň eşidiş ukybynyň, erkekleriňkä garanyňda, has duýgurdygyny ýüze çykardylar. Bu barada «Scientific Reports» žurnaly habar berýär. Barlag Fransiýanyň Tuluza şäherindäki Biodürlülik we daşky gurşaw barlag merkezinden doktor Patrisiýa Balareskiň hem-de Beýik Britaniýanyň Bat uniwersitetinden professor Turi Kingiň ýolbaşçylygynda geçirildi. Barlagyň dowamynda 13 ýurtdan, şol sanda Ekwadordan, Angliýadan, Gabondan, Günorta Afrikadan we Özbegistandan jemi 450 adamyň eşidiş ukyby synagdan geçirildi. Netijeler eşidişiň duýgurlygyna täsir edýän esasy faktoryň jynsdygyny görkezdi. Aýallaryň eşidişi, erkekleriňkä garanyňda, ortaça iki desibel has gowudy. Elbetde, ýaş hem belli bir derejede täsir edýär, ýöne köp däl. Mälim bolşy ýaly, eşidiş ukyby ýylsaýyn kem-kemden peselýär, şeýle-de sag gulak köplenç çep gulakdan has gowy eşidýär. Eşidişiň duýgurlygyna täsir edýän ikinji möhüm faktor bolsa – daşky gurşawdyr. Tokaýlyk ýerlerde ýaşaýan adamlaryň eşidişi duýgur, daglyk sebitlerde ýaşaýan adamlaryňky bolsa pes bolýar. Mundan başga-da, aýallar sözleri kabul etmäge degişli synaglarda erkeklerden has gowy netije gazandylar. Bu bolsa aýallaryň beýnisiniň ses maglumatlaryny has netijeli gaýtadan işleýändigini görkezýär.