Beýik Britaniýanyň Kent graflygyndan 13 ýaşly Sofiýa Kot Arkuri IQ testinde 162 bal toplady – bu kämillik ýaşyna ýetmedikler üçin iň ýokary netijedir. «Daily Mail» neşiriniň habaryna görä, bu hatda Albert Eýnşteýniň we Stiwen Hokingiň görkezijisinden hem ýokary. Bu üstünliginden soň, Sofiýa dünýäniň iň abraýly zehinliler jemgyýeti bolan Mensa guramasyna çagyryldy. Gyzyň ejesi Sesiliýanyň aýtmagyna görä, Sofiýa bu teste hiç hili taýýarlyk görmändir. Sebäbi mekdepde sapaklary örän köp bolupdyr. Netije belli bolanda, ol «begenjinden asmana galan ýaly bolupdyr». Synpdaşlary ilkibaşda onuň bu üstünlige ynanmandyr. Sesiliýa gyzynyň ukyp-başarnyklarynyň heniz kiçi wagtlary belli bolandygyny aýdýar. Ol başlangyç mekdepde iň göreldeli okuwçylaryň biri bolupdyr. Häzirki wagtda Sofiýa informatika bilen gyzyklanýar we geljekde hem hut şu ugurda işlemegi maksat edinýär. «Bir gün ol öýe gelip: „[Informatika] mugallymym hem ýalňyşlygy nädip düzetmelidigini bilenokdy, ony men düzedäýdim“ diýdi» — diýip, Sesiliýa gürrüň berdi. Sofiýa tans bilen hem meşgullanýar, pianino çalýar we onuň dostlary köp. Şeýle üstünlige 2023-nji ýylyň tomsunda 11 ýaşly britan Adrian Li hem ýetipdi. Ol iki ýaşynda okamagy öwrenip, sekiz ýaşynda bolsa ilkinji kitabyny ýazypdy.