31-nji martda Nikosiýa şäherindäki Prezident köşgünde Türkmenistanyň Italiýa Respublikasyndaky ilçisi T.Kömekowyň Prezident Nikos Hristodulidise Türkmenistanyň Kipr Respublikasyndaky Adatdan daşary we Doly ygtyýarly ilçisi (oturýan ýeri Rim ş.) hökmünde ynanç hatlaryny gowşurmak dabarasy geçirildi. Dabaranyň başynda Kipr Respublikasynyň Prezidenti Türkmenistanyň Prezidentine mähirli salamlaryny ýollady we türkmen halkyna iň gowy arzuwlaryny beýan etdi. Kipr Respublikasynyň döwlet Baştutany Türkmenistanyň Prezidentiniň alyp barýan oňyn Bitaraplyk syýasatynyň sebitleýin we halkara derejede parahatçylygy, durnuklylygy we howpsuzlygy pugtalandyrmakda möhüm ornunyň bardygyny belläp geçdi. Öz gezeginde, ilçi T.Kömekow hem Kipr Respublikasynyň Prezidentine hem-de ýurduň halkyna Türkmenistanyň Prezidentiniň mähirli salamlaryny we iň gowy arzuwlaryny ýetirdi. Dabaranyň dowamynda taraplaryň Türkmenistan bilen Kipr Respublikasynyň arasyndaky dostlukly gatnaşyklary özara gyzyklanma bildirilýän ugurlar boýunça mundan beýläk hem ösdürmäge ygrarlydyklary beýan edildi. Ynanç hatlaryny gowşurmak dabarasyndan soň ilçi T.Kömekowyň Kipr Respublikasynyň Prezidenti N.Hristodulidis bilen ikitaraplaýyn duşuşygy geçirildi. Duşuşykda ilçi T.Kömekow türkmen halkynyň Milli Lideri, Halk Maslahatynyň Başlygy Gurbanguly Berdimuhamedow tarapyndan Kipr Respublikasynyň Prezidentine ýollanan Halkara parahatçylyk we ynanyşmak forumyna gatnaşmak baradaky çakylygy gowşurdy. Bu forum Türkmenistanyň başlangyjy bilen 2025-nji ýylyň «Halkara parahatçylyk we ynanyşmak ýyly» diýlip yglan edilmegi hem-de ýurduň hemişelik Bitaraplygynyň 30 ýyllygy mynasybetli şu ýylyň 12-nji dekabrynda Aşgabatda geçiriler. Öz gezeginde Kipr Respublikasynyň Prezidenti türkmen halkynyň Milli Liderine, Halk Maslahatynyň Başlygy Gurbanguly Berdimuhamedowa mähirli salamlaryny ýollap, çakylyk üçin minnetdarlyk bildirdi hem-de Halkara parahatçylyk we ynanyşmak forumyna gatnaşmak maksady bilen Türkmenistana sapar bilen barmaga gyzyklanma bildirýändigini aýtdy. Duşuşygyň ahyrynda taraplar özara gyzyklanma döredýän ugurlar boýunça ikitaraplaýyn gatnaşyklaryň ösdürilmegini we pugtalandyrylmagyny goldamak maksady bilen, işjeň dialogy dowam etdirmäge taýýardyklaryny tassykladylar we birek-birege iň gowy arzuwlaryny beýan etdiler.