Halkara alymlar topary Antarktidadaky Georg VI şelf buzlugyndan ägirt uly A-84 aýsbergi bölünip aýrylandan soň, ilkinji gezek boşap galan deňiz düýbüni öwrendi. Buzlugyň astynda baý ekoulgam ýüze çykaryldy. Ylmy gözleg Şmidt adyndaky Umman institutynyň hünärmenleriniň ýolbaşçylygynda geçirildi we ylmy edaranyň resmi saýtynda ýerleşdirildi. 510 inedördül kilometr meýdanly aýsberg (ululygy boýunça megapolisler bilen deň) 2025-nji ýylyň 13-nji ýanwarynda şelfden bölünip aýryldy. Ekspedisiýa bu ýere 25-nji ýanwarda geldi. Uzak aralykdan dolandyrylýan ROV SuBastian enjamynyň kömegi bilen alymlar 1300 metre çenli çuňlukda deňiz düýbüni öwrendi. Olar uly korallar, gubkalar, buz balygy, deňiz möýleri we osminoglar bilen gülleýän ekoulgamyň üstüni açdy. Bu jandarlar buzuň aşagynda onlarça, hatda ýüzlerçe ýyl ýaşapdyr diýlip çak edilýär. Bu ýer 150 metr galyňlykdaky buz bilen örtülip, Gün şöhlesinden we ýerüsti baýlyklardan üzňelikde bolan. Alymlar umman akymlarynyň bu ýerleri ýokumly maddalar bilen üpjün edendigini çaklaýar. Şeýle-de, hünärmenler sebitiň geologiýasy we okeanografiýasy barada maglumatlary ýygnady. Bu klimatyň üýtgemeginiň Antarktida we deňiz derejesine ýetirýän täsirine düşünmäge kömek eder.

Täzelikler, Ata Watan tarapyndan 1 week ago
Teswir ýazmak üçin Içeri gir