ABŞ-nyň Prezidenti Donald Tramp ähli import awtomobilleri we olaryň esasy komponentleri üçin 25% nyrh girizmek barada permana gol çekdi. Bu barada Ak tamyň saýtynda habar berildi. Gümrük haky 2-nji aprelden güýje girer, ýöne käbir kategoriýalar üçin möhletiň yza süýşürilmegi göz öňünde tutulýar. Salgyt ýolagçy we ýeňil täjirçilik awtomobillerine, hereketlendirijilere, transmissiýa böleklerine, elektron düzüm böleklerine we beýleki ätiýaçlyk şaýlaryna degişlidir. Kanadadan we Meksikadan öndürijiler pajyň diňe amerikan däl böleklere degişli bolmagy üçin önümleri şahadatnamalaşdyryp biler. Ätiýaçlyk şaýlary üçin nyrh mehanizmi heniz doly işlenmedi. Trampyň administrasiýasy bu çäreleriň amerikan awtoulag senagatynyň ösüşine itergi berjekdigini aýdýar. Resmi maglumatlara görä, 1985-nji ýylda ABŞ-da awtoulag serişdeleriniň satuwynyň 97%-i ýerli brendlere degişli boldy. 2024-nji ýyla çenli bu görkeziji 50%-e çenli peseldi, şol bir wagtyň özünde olarda amerikan komponentleri 40%-den gowrak boldy. Trampyň administrasiýasy gümrük haklarynyň býujete 100 mlrd dollar goşmagyna garaşýar. Ýöne analitikler öndürijileriň çykdajylary alyjylaryň “üstüne ýüklejekdigini”, munuň hem awtomobilleriň bahasyny 10 müň dollara çenli ýokarlandyryp, 2025-nji ýylda bazary 700 müň – 2 mln ulaga çenli azaldyp biljekdigini çaklaýar. Pudagyň kärdeşler arkalaşyklary Trampyň başlangyjyny goldap, munuň täze iş orunlaryny döredip biljekdigine bil baglaýar.