Taryhda ilkinji gezek dünýä boýunça akylly sagatlaryň satuwy çärýegiň jemleri boýunça azaldy. Geçen ýylyň soňky çärýeginde bu görkeziji 7% pese gaçdy diýip, «Counterpoint-iň» maglumatlaryna salgylanyp, «BBC» neşiri habar berýär. Hasabata görä, pese gaçyşyň esasy sebäbi, Apple-yň satuwlarynyň azalmagy, arzan modelleriň täzelenişiniň haýallamagy we Hindistanda akylly sagatlara bolan islegiň pese gaçmagydyr. Umumy pese gaçyşa garamazdan, Apple liderligini saklap galdy, emma onuň satuwy 19% azaldy. «GSMArena-nyň» habaryna görä, Huawei kompaniýasy Hytaý bazaryndaky esasy modelleriň, şeýle-de çagalar üçin niýetlenen modelleriň satuwynda 35% ösüş gazanyp, ikinji orny eýeledi. Samsung täze Galaxy Watch 7, Galaxy Watch Ultra we Galaxy Watch FE Series modelleriniň üstünlikli çykarylmagy netijesinde, ýyllyk görkezijisini 3% ýokarlandyryp, üçünji orny eýeledi. Xiaomi 2024-nji ýylda iň çalt ösen brend boldy. Ilkinji gezek «öňdebaryjy bäşligiň» hataryna giren brendiň ýyllyk satuwy 135% ýokarlandy. Apple Watch-yň satuwlary brendiň 10 ýyllygynyň bellenendigine we täze Watch Series 10 modeliniň çykarylandygyna garamazdan pese gaçdy. Munuň esasy sebäbi, Demirgazyk Amerikadaky ýagdaý bilen baglanyşykly: Ultra 3 modeliniň çykarylmazlygy we S10 modelindäki örän ownuk üýtgeşmeler. Mundan başga-da, patent jedelleri ýylyň ilkinji ýarymynda Apple-yň satuwlaryna çäklendirme girizdi. Şeýle-de täze Apple Watch SE modelleriniň çykarylmazlygy hem satuwa ýaramaz täsir etdi. Sebitara görkezijilere görä, 2024-nji ýylyň netijelerine laýyklykda, Hytaý ilkinji gezek iň ýokary satuwy amala aşyryp, hem Demirgazyk Amerikany, hem-de Hindistany yzda galdyrdy. Huawei, Imoo we Xiaomi bazaryň öňdebaryjylary boldy. Çaklamalara görä, 2025-nji ýylda akylly sagatlaryň bazary dikeldiler. Munuň esasy sebäbi, emeli aň bilen has içgin integrasiýalaryň edilmegi we dakylýan enjamlaryň saglygy gözegçilikde saklamak funksiýalarynyň kämilleşdirilmegi bilen bagly bolar.

Täzelikler, Ata Watan tarapyndan 2 weeks ago
Teswir ýazmak üçin Içeri gir