Ýandeks topary «Howa maglumaty» (Яндекс Погода) hyzmatyna täze funksiýany goşandygyny mälim etdi. Bu funksiýa allergiýasy bolan adamlara, ösümlikleriň gülläp başlaýan möwsümine taýýarlyk görmekde ýardam berer. «Tozanyň işjeňligi» (Активность пыльцы) atly bu hyzmat ulanyjylara ösümlikleriň gülleriniň tozanlanyp başlan döwri barada habar berip, indiki 10 gün üçin tozanyň derejesi boýunça çaklamalary hödürleýär. Ýandeks Howa maglumaty topary tarapyndan işlenip düzülen ýörite tehnologiýanyň kömegi bilen, bu hyzmat alty dürli allergeniň — gaýy we olha agaçlarynyň, ambroziýanyň, ýowşanyň, däneli ösümlikleriň we haşal otlaryň tozanlarynyň işjeňligini hasaplaýar. Hyzmatdaky maglumatlar ýörite tozan kartasynda görkezilýär. Eger-de ulanyjy bir sebitden başga bir sebide gitmegi meýilleşdirýän bolsa, «Ýandeks Howa maglumaty» indiki 10 günüň dowamynda şol sebitde tozan bilen baglanyşykly howplaryň boljakdygyny ýa-da bolmajakdygyny barlamaga mümkinçilik berýär. Hyzmat Russiýada we GDA ýurtlarynda elýeterli. «Tozanyň işjeňligi» hyzmaty «Ýandeks Howa maglumaty» ykjam goşundysynda we onuň web wersiýasynda, şeýle hem «Ýandeks Gözlegde» (Яндекс Поиск) we «Ýandeks Brauzeriň» (Яндекс Браузер) baş sahypasynda ähli ulanyjylar üçin elýeterlidir.