Bütindünýä boks guramasy (WBO) agyr agramda çempion ukrainaly Aleksandr Usigiň indiki garşydaşynyň täze zelandiýaly Jozef Parker boljakdygyny kesgitledi. Ol bu titul üçin hökmany dalaşgär hasaplanýar. Iki boksçynyň hem toparyna söweşi geçirmegiň şertleri barada ylalaşmak üçin 30 gün berildi. Şol bir wagtyň özünde, Sky Sports-yň maglumatlaryna görä, ukrainaly boksçynyň wekilleri IBF-niň çempiony Daniel Dýubua bilen söweşmek barada gepleşikleri alyp barýar. Ol fewral aýynda kesel sebäpli Parkere garşy söweşde öz guşagyny goramandy. Usik – Dýubua söweşi Londondaky “Uembli” arenasynda geçirilip bilner. Usik 2024-nji ýylyň dekabrynda bolan soňky söweşinde Taýson Fýuriden üstün çykdy. Emin agzalary oňa ýeňşi biragyzdan berdi, netijede, ol WBA, WBC, WBO we IBO çempionlyk titullaryny gorady. Usik ýeňilmän galýar, onuň hasabynda 23 ýeňiş bar (14-üsi nokaut bilen). Jozef Parker soňky gezek şu ýylyň fewral aýynda Martin Bakole bilen tutluşyga girdi. Söweş ikinji raundda togtadyldy we Parkere tehniki nokaut arkaly ýeňiş berildi. Ol WBO-nyň wagtlaýyn titulyny gorady. Parkeriň hasabynda 36 ýeňiş (24-üsi nokaut bilen) we üç ýeňliş bar.