FIFA-nyň Geňeşi Katary 2025-nji ýylda FIFA-nyň iki ýaryşynyň eýesi hökmünde tassyklady. Ýurtda 3-nji noýabrdan 27-nji noýabr aralygynda Ýetginjekleriň dünýä çempionaty (U-17), 1-18-nji dekabr aralygynda Arap milletleriniň kubogy geçiriler. Ýetginjekleriň dünýä çempionaty ilkinji gezek giňeldilen formatda geçiriler: 48 topar 25 günüň dowamynda 104 oýun oýnar. Arap milletleriniň kubogynda sebitiň iň güýçli 16 topary çykyş eder. “Katar futbolyň üsti bilen ýene bir gezek tutuş sebitiň we dünýäniň adamlaryny birleşdirer. Biz oýunçylary we janköýerleri dünýä derejesindäki desgalar we ýatdan çykmajak tejribe bilen üpjün etmäge sabyrsyzlyk bilen garaşýarys "- diýip, Kataryň Sport we ýaşlar ministri hem-de iki ýaryşyň hem guramaçylyk komitetiniň başlygy şeýh Hamad bin Halifa Al Tani aýtdy. Katar ozal 2022-nji ýyldaky dünýä çempionatyny, 2023-nji ýyldaky Aziýa kubogyny, 2021-nji ýyldaky Arap milletleriniň kubogyny we beýleki iri ýaryşlary üstünlikli kabul edipdi. Ýurt geljekde indiki bäş sany Ýetginjekler dünýä çempionatyny, şeýle hem 2029-njy we 2033-nji ýyllardaky Arap milletleriniň kubogyny geçirer.