NASA astronawlar Butç Uilmor bilen Sunita Uilýamsy Halkara kosmos stansiýasyndan yzyna getirmegi tizleşdirmek kararyna geldi. Olaryň Ýere gaýdyp gelmegi 19-njy marta meýilleşdirilýär diýip, ArsTechnica ýazýar. Crew-10 missiýasy üçin ulanylmaly SpaceX Dragon C213 gämisi bilen baglanyşykly tehniki meseleler sebäpli, bu meýilnama gaýtadan seretmeli boldy. Indi NASA zeper ýeten gämini SpaceX-iň başga bir modeli – öň kosmosa birnäçe gezek çykan C210 Endurance bilen çalyşmagy göz öňünde tutýar. Çeşmäniň maglumatlaryna görä, ony 12-nji martda uçurmak meýilleşdirilýär, eger ugruna bolsa, bu Crew-10 ekipažyna (Uilýams, Uilmor, şeýle-de Nik Heýg we russiýaly kosmonawt Aleksandr Gorbunow) eýýäm 19-njy martda – meýilleşdirilenden birnäçe hepde öň HKS-den gaýtmaga mümkinçilik berer. Eger gämi çalşylsa, SpaceX ýazda meýilleşdirilen Axiom-4 missiýasynyň çäklerinde HKS-e “syýahatçylyk” uçuşyny yza süýşürmeli bolar, çünki onuň üçin C210 gämisi taýýarlanypdy. Eger inženerlere täze gämidäki näsazlyklary düzetmek başartsa, C213 bu gäminiň ornuny eýelär. SpaceX NASA-nyň pikirinden ýüz öwürmese gerek, sebäbi mundan öň kompaniýanyň ýolbaşçysy Ilon Mask ABŞ-nyň Prezidenti Donald Trampa astronawtlary mümkin boldugyndan ir yzyna gaýtarmaga wada beripdi. ABŞ-nyň täze administrasiýasynyň syýasy beýanatyna garamazdan, NASA öz çözgütlerini tehniki we logistiki şertler bilen esaslandyrýar. Bellenilişi ýaly, astronawtlaryň yzyna getirilmegini tizleşdirmek baradaky çözgüt Tramp wezipä girişmezden ozal kabul edildi.