ABŞ-nyň Prezidenti Donald Tramp kriptowalýutany Birleşen Ştatlar üçin ýurt ähmiýetli ugra öwürjek permana gol çekmegi meýilleşdirýär. Bu barada Bloomberg agentligi habar berýär. Çeşmelere görä, resminamada bu ugurda syýasaty işläp düzmek bilen meşgullanjak kriptowalýuta boýunça konsultatiw geňeşi döretmek teklip edilip bilner. Şeýle-de, hökümetiň sanly aktiwler bilen bagly syýasatyna täzeden garamak, şol sanda kriptowalýuta işleri boýunça kazyýet garamagynyň togtadylmagy ara alnyp maslahatlaşylýar. Tramp milli kriptowalýuta ätiýaçlygyny döretmegi hem göz öňünde tutýar. Öň, Tramp telekeçi Dewid Saksy ABŞ-nyň emeli aň we kriptowalýuta ugry boýunça syýasatyna jogapkär hökmünde belledi. Özüniň saýlawdan öňki kampaniýasynyň çäklerinde Ak tamyň täze ýolbaşçysy kriptowalýutalaryň ösüşini işjeň goldady we ABŞ-nyň Hytaý ýaly beýleki ýurtlara öňdebaryjylygy bermezlik üçin bu bazara ünsi güýçlendirmelidigini aýtdy. Syýasatçy tarapyndan kriptowalýuta bazarynyň goldanylmagy minnetdarlyk seslenmesini alýar. Mysal üçin, Uoll-Stritde uly Bitcoin maýneri Marathon Digital Holdings (MARA) Trampyň portretini Bitcoin blokçeýnine salyp, ony ebedileşdirdi. Saýlanan Prezidentiň portreti 879613 blogunda ýerleşdirildi. Blokçeýniň aýratynlygy sebäpli, bu blok Bitcoin-iň özi bar bolmagyny dowam etdirýärkä, şol ýerde galar.