Amerikaly Jastin Getji we täze zelandiýaly Den Huker UFC 313 ýaryşynyň çäklerinde söweşer. Bu barada UFC-niň metbugat gullugy habar berdi. Söweş bäş raunddan ybarat bolar. Ýaryşyň özi 2025-nji ýylyň 8-nji martyndan 9-njy martyna geçilen gije Las-Wegasda (ABŞ, Newada ştaty) geçiriler. 36 ýaşly Jastin Getji UFC-de ýeňil agram derejesinde çykyş edýär. Ol soňky söweşini 2024-nji ýylyň aprel aýynda geçirdi we watandaşy Maks Holloueýden nokaut arkaly ýeňildi. 34 ýaşly Den Huker soňky üç söweşinde ýeňiş gazandy. 2024-nji ýylyň awgustynda geçirilen ahyrky söweşinde Huker emin agzalarynyň tapawutly karary bilen Mateuş Gamroty ýeňdi. Şeýle-de, UFC-niň metbugat gullugy 93 kg çenli derejede UFC-niň titulynyň häzirki eýesi, braziliýaly Aleks Pereýranyň russiýaly söweşiji Magomed Ankalaýew bilen duşuşjakdygyny resmi taýdan anons etdi. Anonsdan görnüşi ýaly, bu söweş hem UFC 313-de geçiriler. Ýatlap geçsek, Aleks Pereýra 6-njy oktýabrda Solt-Leýk-Sitide geçirilen UFC 307-de amerikaly söweşiji Halil Rauntri bilen duşuşdy. Söweş braziliýalynyň dördünji raundda tehniki nokaut arkaly ýeňiş gazanmagy bilen tamamlandy.