«Awaza» milli syýahatçylyk zolagynda, Aşgabatda hereket edýän meýdança ýaly, golf meýdançasyny gurmak meýilleşdirilýär. Bu barada Halk Maslahatynyň Başlygy Gurbanguly Berdimuhamedow 19-njy dekabrda Awtomobil sport toplumynyň täze binalar toplumyny gurmak üçin meýilleşdirilýän ýere baryp görmeginiň çäklerinde aýtdy. Türkmen halkynyň Milli Lideri ýurdumyzda awto we motosportuň dürli görnüşlerini ösdürmegiň ähmiýetlidigine ünsi çekip, geljekde halkara derejedäki awtoralli ýaryşlarynyň guralmagy babatda degişli işleri geçirmegiň zerurdygyny aýtdy. Şeýle-de soňky ýyllarda ýaşlaryň arasynda golf meýdançalaryna bolan gyzyklanmalaryň artýandygyny nazara alyp, paýtagtymyzda hereket edýän meýdança ýaly, «Awaza» milli syýahatçylyk zolagynda hem golf meýdançasyny gurmak boýunça taýýarlyk işleriniň alnyp barylmagy babatda maslahatlaryny berdi.