“Çelsiniň” hüjümçi ýarymgoragçysy Koul Plamer Angliýanyň Premýer-ligasynda 2023/24 möwsüminiň iň gowy ýaş oýunçysy boldy. Bu barada Beýik Britaniýanyň Professional futbol assosiasiýasy (PFA) 20-nji awgustda geçirilen dabarada yglan etdi. 22 ýaşly angliýaly ýarymgoragçy “Çelsä” 2023-nji ýylyň tomsunda “Mançester Sitiden” geçdi. Bu döwürde ol ähli ýaryşlarda 45 oýna gatnaşyp, 25 gol we 15 netijeli geçirim bilen tapawutlandy. 13-nji awgustda Londonyň kluby Palmer bilen şertnamanyň 2033-nji ýyla çenli uzaldylandygyny resmi taýdan yglan etdi. Transfermarkt portalynyň maglumatlaryna görä, futbolçynyň bazar bahasy 80 mln ýewro. Şeýle-de, PFA geçen möwsüm üçin APL-iň simwoliki toparyny yglan etdi. Iň gowy 11 futbolçynyň sanawyna “Arsenalyň” bäş, “Mançester Sitiniň” dört wekili goşuldy. Derwezeban: Dawid Raýýa (“Arsenal”); Goragçylar: Wilýam Saliba (“Arsenal”), Wirjil wan Deýk (“Liwerpul”), Gabriel Magalýans (“Arsenal”), Kaýl Uoker (“Mançester Siti”); Ýarymgoragçylar: Rodri Ernandes (“Mançester Siti”), Deklan Raýs (“Arsenal”), Martin Edegor (“Arsenal); Hüjümçiler: Erling Holand (“Mançester Siti”), Filip Foden (“Mançester Siti”), Olli Uotkins (“Aston Willa”). PFA dünýäde iň gadymy professional türgenleriň assosiasiýasy hasaplanýar. Ol 4000 gatnaşyjyny öz içine alýar.