Hytaýyň Xiaomi kompaniýasy elýeterli flagmanynyň täze görnüşini – Redmi K70 Ultra Lamborghini Edition smartfonyny anons etdi. Esasy wersiýa bolan Redmi K70 Ultra ýakynda eýýäm anons edildi, ýöne heniz satuwa çykarylmady. Täze hataryň resmi tanyşdyrylyşy 19-njy iýulda geçiriljek uly Xiaomi çäresinde bolar. Häzirki wagtda modeliň resmi, janly suratlary, şeýle-de ol barada giňişleýin maglumatlar elýeterli boldy. Lamborghini Edition dizaýny boýunça esasy wersiýa Redmi K70 Ultra-dan tapawutlanýar, onuň obrazy Huracan Super Trofeo EVO2 ýaryş awtomobilinden ylham aldy. Model iki esasy görnüşde – ýaşyl we mämişi reňklerde hödürlendi. Suratda smartfonyň yzky panelinde özboluşly formada esasy kamera bloguny we Lamborghini logotipini görmek bolýar. Mundan başga-da, gurluş bilen toplumda awtoulagyň stilinde ýerine ýetirilen gorag daşlygy, zarýad beriji gurluş we beýleki birnäçe aksessuar hödürlenýär. Modeliň aýratynlyklary: SoC MediaTek Dimensity 9300+, 1,5K durulygy we 144 Gs kadr ýygylygy bolan OLED ekrany, 50 Mp Sony IMX906 datçikli esasy kamera, 120 Wt kuwwatly zarýad beriş bilen 5500 mA/sag sygymly akkumulýator, suwdan we tozandan gorag (IP68). Belläp geçsek, bu Xiaomi bilen Lamborghini-niň eýýäm ikinji hyzmatdaşlygydyr – 2023-nji ýylyň ahyrynda bolan birinji hyzmatdaşlygyň netijesinde Redmi K70 Pro Lamborghini Edition çykdy, bu model 4,6 müň ýuana satyldy.