12-nji iýulda geçirilen giňişleýin Hökümet mejlisiniň barşynda Prezident Serdar Berdimuhamedow N.Amannepesowy başga has jogapkärli işe geçmegi sebäpli, Türkmenistanyň Ministrler Kabinetiniň Başlygynyň orunbasary wezipesinden boşatdy. Bellenilişi ýaly, N.Amannepesow saglygy goraýyş ulgamynda köp ýyllaryň dowamynda toplan tejribesini täze gurulýan halkara merkezlerinde netijeli ulanar. Serdar Berdimuhamedow Ministrler Kabinetiniň Başlygynyň ylym, bilim, saglygy goraýyş, sport, ýaşlar we jemgyýetçilik meseleleri boýunça orunbasary wezipesine B.Orazdurdyýewany belläp, ony bilim ministri wezipesinden boşatdy. B.Orazdurdyýewa bildiren ýokary ynamy üçin Türkmenistanyň Prezidentine tüýs ýürekden hoşallyk bildirip, bu toplumyň öňünde durýan möhüm wezipeleri ýerine ýetirmek üçin ähli çäreleri görjekdigine ynandyrdy. Serdar Berdimuhamedow bilim ministri wezipesine Daşary işler ministrliginiň Halkara gatnaşyklary institutynyň rektory wezipesinde işlän J.Gurbangeldiýewi belledi. Baýramgül Orazdurdyýewa Türkmenistanyň bilim ministri wezipesine 2024-nji ýylyň fewralynda bellenildi. Ondan öň, ol Magtymguly adyndaky Türkmen döwlet uniwersitetiniň rektory wezipesinde işleýärdi. Täze wise-premýer hukuk ugrundan ýokary bilim aldy. Ol Magtymguly adyndaky TDU-da mugallym, bilim ministriniň ýokary we orta hünär okuw mekdepleri boýunça orunbasary wezipelerinde işledi.