Amerikan tehnologiýa ägirdi Microsoft 100 müň filippinli zenana emeli aň (AI) we kiberhowpsuzlyk tehnologiýalary boýunça bilim berjek haýyr-sahawat maksatnamasyny yglan etdi. Bu barada South China Morning Post neşiri (SCMP) habar berýär. Bu maksatnama söwda ministri Jina Raýmondonyň ýolbaşçylygyndaky ABŞ-nyň wekiliýetiniň Filippinlere iki günlük söwda saparynyň dowamynda yglan edildi. Zenanlara bilim bermek işi Microsoft-yň onlaýn platformasynda geçiriler. Olara OpenAI-iň uly dil modellerine esaslanýan Microsoft-yň emeli aň gurallaryny ulanmak öwrediler. Alnan bilim filippinli zenanlaryň hünär derejesini ýokarlandyrar we giňden ýaýran kiberhowplara garşy habardarlygyny artdyrar. Filippinleriň söwda ministriniň orunbasary Rafaelita Aldaba bu okuwyň «ýurduň kiberhowpsuzlygyny güýçlendirip, zenanlaryň emeli aň tehnologiýalarynyň ornaşdyrylmagyna ynamyny artdyryp biljekdigini» aýtdy.